Osy aptada eki kún ishinde tórt oblystaǵy İshki ister departamentiniń basshylary aýysty.
Maýsym aıynyń basynda iri lańkestik oqıǵasy bolǵan Aqtóbe oblystyq İİD bastyǵy Maqsutqan Ablazımov Batys Qazaqstan oblystyq İİD bastyǵy Mahambet Abısatov ekeýi kreslo aýystyrdy.
Atyraý oblystyq İİD-ge de jańa basshy taǵaıyndaldy. İİM-niń kadr rezervine ótken Arman Jalmuhambetov buǵan deıin birinshi orynbasary bolyp kelgen Aıan Dúısembaevqa ornyn bosatty.
Sondaı-aq, búgin Ońtústik Qazaqstan oblystyq İİD bastyǵy polısıa general-maıory Asqar Ospanov laýazymynan alynǵany týraly habarlandy. Onyń ornyna osyǵan deıin Qyzylorda oblystyq İİD basqarǵan polısıa polkovnıgi Janat Súleımenov taǵaıyndaldy.
Ázirge Qyzylorda oblystyq İİD-ge kim baratyny belgisiz.
Asqar Ospanov
Aqtóbe men Batys Qazaqstan, Qyzylorda oblystarynyń bas polıseıleri laýazymdaryn bosatqanymen dalada qalǵan joq. Dárejesi teń basqa laýazymdarǵa jaıǵasty. Al, Ońtústik Qazaqstan oblystyq İİD-niń burynǵy bastyǵy Asqar Ospanovtyń jaǵdaıy birshama qıyn sıaqty. Óıtkeni, buǵan deıin maýsym aıynda onyń burynǵy birinshi orynbasary Sáken Aıtbekov memlekettik tóńkeris josparlady dep aıyptalyp jatqan shymkenttik Toqtar Tóleshovtiń isi boıynsha qamaýǵa alynǵan edi. Osy oqıǵadan sál buryn İİD-niń tórt birdeı polkovnıgi óz erikterimen qyzmetten ketý týraly baıanat jazǵan bolatyn.
El arasynda sońǵy ýaqytta ishki ister organdarynyń qyzmetine kóńili tolmaıtyndar kóp baıqalyp júr. Ondaı narazy kóńil-kúıdiń qalyptasýyn elde sońǵy aılarda bolǵan teraktilermen baılanystyrýshylar bar.
Esterińizge salsaq, osyǵan deıin Almaty qalasy polıseılerinińi atynan dep jazylǵan anonımdik hat birqatar aqparat quraldaryna tarap, onda Almaty qalasy İİD bastyǵy S. Kúdebaevtiń qyzmetine syn aıtylǵan bolatyn.
Sonymen qatar, İİM mınıstri Q. Qasymovqa qatysty da aqparat quraldarynda synı materıaldar jarıalanýda. Onda mınıstrdiń lańkkes qolynan qaza tapqan marqumdarmen qoshtasý rásimine, jaralanǵan polıseılerge halin surap barmaǵany aıtylady.
İshki ister organdaryndaǵy kadrlyq aýys-túıister osymen toqtaı ma, joq álde jalǵasyn taba ma, ol jaǵy belgisiz. Biraq ta, 2011 jyldyń sáýir aıynan beri İİM-di basqaryp kele jatqan Q. Qasymovqa qarata aıtylyp jatqan syn-eskertpelerdiń az emestigin atap ótken jón.
