Qytaı elshiligi mańynda bolǵan jarylystan soń Bishkekte dıplomatıalyq ókildikter men memlekettik vedomstvolarda qaýipsizdik sharalary kúsheıtildi.
Qyrǵyzstandaǵy Qazaqstan elshiliginen habarlaǵandaı, elshilikte polısıa baqylaýy kúsheıtilgen, sondaı-aq dıpmısıanyń aýmaǵyn sanksıalanbaǵan kirýden qorǵý úshin qaqpalardyń aldyna metal konstrýksıalar (antıtaran) ornatyldy, - dep habarlaıdy Qamshy.kz QazAqparatqa silteme jasap.
Búgin saǵat 9.30-da Bishkekte ornalasqan Qytaı elshiligi mańynda jarylys boldy. Aldyn ala málimetter boıynsha, quqyq qorǵaý organdary oqıǵany terakt bolýy múmkin ekendigin atap ótti. Mekemeniń batys qaqpasyn buzyp kirgisi kelgen Mitsubishi Delica kóligi jarylǵan.
Jarylys saldarynan avtokólikte bolǵan júrgizýshi qaza tapqan jáne 2 adam zardap shekken. Júrgizýshiniń aty-jóni anyqtalýda. Dıplomattardyń eshqaısysy zardap shekken joq.
Oqıǵa ornynda Qyrǵyzstan ulttyq qaýipsizdik memlekettik komıteti Lańkestikke qarsy ortalyq qyzmetkerleri jumys istep jatyr.
