Búgin Parlament palatalarynyń birlesken sesıasynda Elbasy Nursultan Nazarbaev osylaı dep málimdedi.

«Ótken jazdaǵy oqıǵalar álemdegi eshbir eldiń lańkestik áreketterden qorǵalmaǵanyn kórsetti. Lańkestik qater Qazaqstanǵa da keldi. (...) Eldiń bári biz Táýelsizdiktiń ekinshi jıyrma bes jyldyǵyn qıyn jaǵdaımen bastaǵanymyzdy aıtyp júr», - degen ol Aqtóbe, Almaty qalalarynda bolǵan teraktilerge de toqtaldy.

«Qazaqstan álemniń basqa da elderi sıaqty lańkestik qatermen betpe-bet kelip otyr. Aqtóbe, Almaty qalalaryndaǵy teraktiler kezinde Ulttyq ulan jaýyngerleri, polıseıler, esh kinási joq azamattar qaza tapty», - dedi N. Nazarbaev.

Prezıdent mundaı qaýip-qaterge qatań zańmen ǵana qarsy turýǵa bolatynyn basa aıtty.

«Bizge mundaı sharýalarǵa qarsy turý úshin batyl zańnamalyq sharalarǵa barý kerek. Meniń tapsyrmammen ekstremızm, terorızm, qarsy barlaý qyzmeti, daktıloskopıalyq jáne gendik tirke, probasıa, eldiń aqparattyq qaýipsizdigin qamtamasyz etý máseleleri boıynsha jeti zań jobasy ázirlenip, Májiliske usynylady. Qazir eń bastysy – qoǵamdaǵy qaýipsizdik pen turaqtylyqty saqtaý», - dedi Elbasy.

Parlament jumysynyń ekinshi sesıasy el Táýelsizdiginiń 25 jyldyǵyna tuspa-tus kelip otyrǵanyna nazar aýdartqan prezıdent jańa sesıada 50-ge jýyq zań jobasy talqylanyp, qabyldanatynyn aıtty.

«Bul tek toı toılaý emes. Biz árbir aýyl, qala, oblys, óńirlerdegi halyqqa shırek ǵasyr ishinde jetken jetistikterimizdi kórsetýimiz kerek. Osy kezeńge belgilengen is-sharalar qazirden bastalýy tıis», - dedi Elbasy.

Sondaı-aq, prezıdent Ult josparyn júzege asyrý, halyqtyń ál-aýqatyn arttyrý men zań sapasyn jetildirý, jańa zańdardy halyqqa túsindirý jaıyna da toqtaldy.