Qazaq sport jáne týrızm akademıasynda bilim kúni merekesiniń sońy talapkerlerdiń narazylyq sharasyna ulasyp ketti. Esik aldyn qaýmalaǵan túlekter grantqa túse almaǵandaryna renjýli. Al osy akademıaǵa qujat tapsyrǵan 250-deı respýblıkalyq, halyqaralyq jarystardyń júldegerleri úshin nebári 20 grant bólinipti, - dep habarlaıdy Qamshy.kz KTK arnasyna silteme jasap.
Bilim kúni ózge oqý oryndary sekildi Qazaq sport jáne týrızm akademıasynda da osylaı atalyp ótip jatqan. Rıo Olımpıadasynyń chempıony men júldegerleri qonaq bop, kádimgi merekege jalǵasqan edi. Alaıda saltanatty sharany aıaqtatpaı, talapkerlerdiń qalyń toby esik aldyn qaýmalap aldy. Óńkeı respýblıkalyq, halyqaralyq dodalardyń júldegerleri grantqa ilige almaı qalǵan. Jaǵdaıdy ýshyqtyrǵysy kelmegen akademıa basshylyǵy aldarynan shyǵyp, sabyrǵa shaqyrdy.
-Memlekettik grant sany jyldaǵyǵa qaraǵanda óte az bólingen bolatyn. Sizderdiń narazylyqtaryńyzdy óte oryndy dep oılaımyz.
Arnaıy sport mektepteri men kolejderiniń túlekterinen akademıaǵa 250-ge tarta qujat tapsyrylypty. Biraq joǵary oqý ornynda olarǵa nebári 20-aq grant bólingen eken.
Aıdos Dýash, talapker:
-Bokspen aınalysqanyma 5 jyl boldy. Osy bes jyldyń ishinde Qazaqstannan eki ret 3-shi aldym, bir ret birinshi oryn aldym. Sosyn Azıa birinshiliginen birinshi oryn aldym.Grant az bólinip jatyr. Sol sebepten túse almaı qalyp otyrm osy jerge. 1-2 bal ǵana jetispeı.
Talapkerlerdiń arasynda aldaǵy Qysqy Ýnıversıadaǵa qatysaıyn dep otyrǵandary da bar.
Igor Inskıı, talapker:
- Shańǵy sportynan Ýnıversıadaǵa qatysatyndardyń birimin. Biraq grant jetkilikti bólinbegendikten endi búkilálemdik jarystan qalyp qoıýym múmkin. Óıtkeni aqyly oqýǵa shamam jetpeıdi.
Akademıada kolejden kelgenderge byltyr 60 oryn bólinipti. Ol da asa kóp emes. Al bıyl sonyń ózi 3 esege deıin qysqaryp ketken. Basshylyq bolsa, ózderinshe aqtalyp álek.
Muhtar Esqalıev, Qazaq sport jáne týrızm akademıasynyń prorektory:
- QR-nyń Bilim jáne ǵylym mınıstriniń atyna ózimiz hat joldaǵan bolatynbyz, osy másele boıynsha. Qosymsha osy qysqartqan oqý túrine dene shynyqtyrý mamandyǵy boıynsha qosymsha oryndar bólinse degen. Búgingi kúnde eshqandaı nátıjesin berip otyrǵan joq.
Aıta keterligi, Bilim mınıstrliginiń ózi 2012 jyly osy dene shynyqtyrý jáne sport mamandyqtarynyń grant sanyn myńǵa deıin jetkizý týraly bastama kóteripti. Biraq ol sóz júzinde qalǵan. Al granttan qaǵylǵan myna talapkerler úshin endi 400 myń teńge tólep, aqyly oqýǵa týra keledi.
