Reseı Prezıdenti Vladımır Pýtınniń Shveısarıa bankterindegi esep-shotynda 40 mıllıard dollar bar. Bul týraly óziniń derekkózine silteme jasap, brıtandyq The Times gazeti jazdy, - dep habarlaıdy "Dojd" telearnasy.

Basylymnyń málimeti boıynsha, amerıkalyq resmı ókilder Vladımır Pýtınǵa tıesili aktıvterdiń barlyǵyna tyıym salýdy qarastyryp jatyr.  The Times basylymynyń jazýynsha, bul másele beısenbide Jenevada ótken kelissózder barysynda, eger Ýkraınadaǵy daǵdarysty sheshý tyǵyryqqa tireletin bolsa, onda Reseı bıliginiń basty ókiline qatysty qoldanylatyn eń oryndy sanksıa retinde qarastyrylǵan.

Bul aktıvterdiń barlyǵy Reseı Prezıdentine tıesili ekenin dáleldeý ońaı bolmaıdy. Degenmen amerıkalyq qarjy mınıstrliginde izdestirý ókilettiligi bar, - dep jazady brıtandyq gazet.

Basylymnyń jazýynsha, batystyń barlaý qyzmetkerleri Reseıdiń iri energetıkalyq kompanıalary aksıasynyń ıegeri Vladımır Pýtınniń  qazynasy Shveısarıa bankterinde dep kúdiktenýde. Qaı bankte ekeni naqtylanbaǵan. Degenmen, The Times derekkóziniń málimeti boıynsha, Pýtın óziniń barlyq aktıvterin shet eldik qarjy ınstıtýtynda, basqa bireýdiń atyna rásimdep qoıǵan.

The Times gazetiniń aqparaty boıynsha, AQSH Shveısarıa bankteri máselege túsinistikpen qaraıdy dep senýde. Soǵan baılanysty basylym AQSH-tyń qarjy mınıstrligindegi derekkóziniń "biz banktterdiń barlyǵyn teksere almaımyz, biraq sanksıa jeke tulǵaǵa salynyp turǵan kezde birige jumys jasaımyz degen úmittemiz" degen sózin jazǵan.  tengrinews.kz