«Gazet — halyqtyń kózi, qulaǵy hám tili. Adamǵa kóz, qulaq, til qandaı kerek bolsa, halyqqa gazet sondaı kerek. Gazeti joq jurt basqa gazeti bar jurttardyń qasynda qulaǵy joq kereń, tili joq maqaý, kózi joq soqyr syqyldy. Dúnıede ne bolyp jatqanyn kórý joq, ne sóılenip jatqanyn estý joq, óz pikirin aıtý joq» deıdi Ahmet Baıtursynov «Qazaq» gazetinde.Ol endi bir maqalasynda «Sóz – qarý, buny buzýǵa jumsasaq, buzady. Túzetýge jumsasaq, túzeıdi» dep jazady. Buqaralyq aqparat quralynyń tek aqparat taratýshy ǵana emes, qoǵamdyq kózqarasty, ıdeologıany qalyptastyrýshy qural, búgingi aqparattyq maıdandaǵy negizgi qarý ekenin odan artyq aıta da almaspyz.

2013 jyldyń 31 jeltoqsanyndaǵy resmı málimet boıynsha Qazaqstanda 2 783 buqaralyq aqparat quraly jumys isteıdi. Onyń ishinde tolyqtaı memlekettik tilde aqparat taratatyn BAQ sany – 555 (20%) bolsa, taza orys tildiler sany – 938 (34%), orys jáne qazaq tilindegisi – 941 (34%), basqa tilde aqparat taratatyndar sany – 349 (13%) quraǵan.

Alaıda, osy jyldyń naýryz aıynda qazaq tildi «Elarna» jumysyn toqtatty. Ekonomıka jáne búdjettik josparlaý mınıstri Erbolat Dosaev Elarnaǵa jyl saıyn 2 mlrd teńge bólinip otyrǵan dese, Elarnanyń dırektory Serik Abas-SHah ondaı aqshanyń arnada bolmaǵanyn ashyq aıtty. Biraq, 2 mlrd. teńgeniń qaıda ketkenine Rashıd Túsipbekov te, Asqat Daýylbaev ta mán bergen joq.

Bildeı bir arna jabylyp jatqanda, Qazaqstannyń ulttyq qaýipsizdigine, Konstıtýsıalyq qurylysyna, jeriniń tutastyǵyna ashyq qaýip tóndirip, «Kazahstan doljen stat gýbernıeı Rossıı» degendi aıtqyzyp, Ermek Taıchıbekov sıaqty separatısterden suhbat alǵan zonakz.net, (http://www.zonakz.net/articles/68865 )  ony jarysa kóshirip basyp, maı quıa túsken yvision.kz,  (http://yvision.kz/post/406698), m.pavon.kz (http://m.pavon.kz/post/view/31506/see375141) sıaqty saıttarǵa eskertý jasaýǵa da jaramaǵan  Quzyrly organ Gıtler týraly maqala jazǵany úshin «Ańyz adam» jýrnalyna  QR Qylmystyq kodeksiniń  164-baby boıynsha aıyp taǵyp,  áleýmettik, ulttyq, rýlyq, násildik nemese dinı arazdyqty qozdyrýshy retinde tanyp otyr.

Bul óz kezeginde el  bıliginiń qazaq BAQ máselesinde «dvoınoı standart» ustanyp otyrǵanyn dáleldeıdi.

Reseıdiń aqparattyq ekspansıasynan shyqpaı, táýelsiz, ulttyq aqparat keńistigin qurmaı eldiń, memlekettiń táýelsizdigi baıandy bolmaıtynyn ultshyl azamattar jıi jazyp ta, aıtyp ta júrmiz. Al sol eskertý, janaıqaıǵa resmı bıliktiń «nazar aýdarǵan» jaǵdaıyn kórip otyrmyz.

Ia, Gıtler-fashıst. Ony tarıh ta, ǵylym da áldeqashan dáleldegen. Alaıda, Naǵashybaı Esmurzanyń bir maqalasy úshin jýrnaldyń bas redaktoryn 12 jylǵa bas bostandyǵynan aıyrýdy kózdeý bılik tarapynan saıası kórsoqyrlyq qana emes, quqyqtyq saýatsyzdyq dep baǵalaǵan jón. Sebebi, Qazaqstan Konstıtýsıasynyń 5-babynda «Qazaqstan Respýblıkasynda ıdeologıalyq jáne saıası ár-alýandylyq tanylady» dep anyq jazylyp tur. Al QR «Buqaralyq aqparat quraldary týraly» zańynyń 2-babynda «Sóz, shyǵarmashylyq bostandyǵyna, óz kózqarastary men senimderin baspa arqyly jáne ózge de nysanda bildirýge, aqparattardy zańda tyıym salynbaǵan kez kelgen ádispen alýǵa jáne taratýǵa Qazaqstan Respýblıkasynyń Konstıtýsıasynda kepildik beriledi. Senzýraǵa tyıym salynady» dep kórsetilgen. Sonymen birge, aıypshyldar atalǵan zańnyń 26-babynan da habarsyz nemese ol baptardy, ıaǵnı zań talaptaryn ádeıi, óreskel buzyp otyr.

Bıliktiń, resmı organdardyń Konstıtýsıa normalaryn, zańdardy burmalap, aıaq asty etip kele jatqany bir bul emes. Qazaqstan azamattarynyń Konstıtýsıalyq quqyqtary men bostandyqtaryn qorǵaý bıliktiń negizgi mindeti edi. Alaıda, Konstıtýsıa normalaryn birinshi bolyp iske asyrýy tıis, adam quqyqtary men bostandyqtaryn qorǵaý mindettelgen atqarýshy bılik organdarynyń óreskel áreketteri qoǵamdaǵy alańdaýshylyq pen halyqtyń narazylyǵyn týdyrýmen birge, eldiń tynyshtyǵyn saqtaýǵa da keri áserin tıgizýde.

Dál osylaı jalǵasa berse, halyqtyń óz bıligin ózi qolyna alyp, ádildikti ózi ornatýǵa talpynys jasary anyq...