Sáýirdiń 28-i kúni Astanada "Antıgeptıl" qozǵalysynyń 15 shaqty múshesi Aqordanyń aldynda qarsylyq aksıasyn ótkizdi. Azattyq tilshisiniń habarlaýynsha, belsendiler reseılik "Proton-M" zymyran tasyǵyshtarynda geptıl otynynyń paıdalanylýyna, endi qurylǵaly jatqan Eýrazıa ekonomıkalyq odaǵyna, Reseıdiń Qyrymdy aneksıalap alýyna qarsylyqtaryn bildirgen hattaryn Aqordanyń aldyndaǵy jáshikke saldy. Narazylar búgin Baıqońyr ǵarysh aılaǵynan "Proton-M" zymyran tasyǵyshynyń kezekti ret ushyrylýyna baılanysty Qazaqstan prezıdentine senimsizdik bildiretininderin de málimdedi. Belsendiler hat salǵan soń "Senzýraǵa jol joq!", "Eýrazıa Odaǵyna jol joq!" jáne "Jasasyn Qyrym!" degen jazýy bar plakattar kóterdi. Plakattardy ashqan soń birer mınýttan keıin qaraýyldap júrgen polısıa belsendilerdi arnaıy kólikterge mingizip, Esil aýdandyq ishki ister bólimine alyp ketti. Búgin tańerteń Baıqońyrdan qazaqstandyq "QazSat-3" spýtnıgin tirkegen "Proton-M" zymyran tasyǵyshy ushyrylǵan edi. Zymyran bul joly reseılik baılanys spýtnıkterin de jer orbıtasyna shyǵarady. Qazaqstan 2006 jyly "QazSat-1", 2011 jyly "QazSat-2" spýtnıgin ǵaryshqa ushyrǵan. Qyzmet etý merzimi on jylǵa jaramdy delingen "QazSat-1" eki jyldan keıin buzylyp qalǵan. Reseı 2014 jyly Baıqońyrdan jıyrma shaqty zymyran tasyǵysh ushyrýdy josparlap otyrǵany, olardyń jeteýi - «Proton» ekeni budan buryn habarlanǵan. 2013 jyly shildeniń 2-sinde reseılik úsh «Glonass» spýtnıgi tıelgen «Proton-M» zymyran tasyǵyshy Baıqońyrdan usha bere apatqa ushyrap, jarylyp ketken edi. Apat ornyndaǵy zıandy zattardyń shektik konsentrasıasy týraly eki eldiń aqparaty eki túrli bolǵan. Qazaqstandyq mamandardyń baǵalaýynsha ol 660-tan 330-ǵa deıin, al reseılik mamandardyń esepteýinshe 130-dan 10-ǵa deıin tómendegen. Apattan keıingi aılarda qazaqstandyq belsendiler Reseıdiń Baıqońyrdan geptıl qoldanatyn zymyrandar ushyrmaýyn talap etken birneshe aksıa ótkizdi. Kóp uzamaı 2013 jylǵy shilde aıynda astanalyq bir top ekolog pen belsendi "Antıgeptıl" qozǵalysynyń qurylǵanyn jarıalaǵan.

Azattyq radıosy