"Reseı prezıdenti Vladımır Pýtın "Ýkraınadaǵy jaǵdaıǵa baılanysty Reseıge qatysty Eýroodaq pen AQSH engizgen sanksıalardyń eýrazıalyq ıntegrasıaǵa áseri bolmaıdy" dep málimdedi". "Reseıge qatysty sanksıalardyń eýroıntegrasıaǵa qandaı áseri bolýy múmkin?" degen saýalǵa Pýtın: "Eshqandaı áseri bolmaıdy, ıntegerasıa bul tek qatysýshy elderge qatysty shara" dep jaýap berdi. "Biz búgin alǵa qaraı mańyzdy qadam jasadyq. Eksporttyq máselelerdiń keıbir tustarynda kelisýshi taraptar arasynda tolyqtaı túsinistik bola bermeıdi. Búgingi jasalyp otyrǵan qadam eýroıntegrasıa kelisimine belgilegen ýaqytta qol qoıylatynyn kórsetti dep oılaımyn. Áli de keı tustaryn sońyna jetkizý qajet. Dese de, barlyq taraptar bir kelisimge kelip otyr" dep qosty Pýtın. Sondaı-aq, Pýtın, Reseıge qatysty sanksıanyń ekinshi paketiniń ne úshin engizilip otyrǵanyn túsinbeıtinin jetkizdi. Onyń sózine qaraǵanda, Ýkraınadaǵy jaǵdaıǵa baılanysty deıtindeı esh sebep joq. "Birinshi paketti zańsyz dep bilemiz. Ol Reseı men AQSH jáne Eýropalyq ekonomıkalyq odaq arasyndaǵy qarym-qatnasqa zalal keltiredi. Al, ekinshi paket múldem túsiniksiz. Qazirgi Ýkraınada bolyp jatqan jaǵdaıǵa munyń esh qatysy joq" dedi Pýtın. Sonymen qatar Reseı prezıdenti Ýkraınada reseılik áskerıler men áskerı ınstrýktorlardyń joq ekenin atap ótti. "Biz únemi sol jerde reseılik arnaıy jasaq, áskerı ınstrýktorlar bar degendi estımiz. Ýkraınada reseılik áskerılerdiń, áskerı ınstrýktorlardyń, arnaıy jasaqtyń joq ekeninine tolyq jaýap beremin" dep atap ótti Pýtın.