Bul kitapty N.Á.Nazarbaevtyń ómiri men qyzmetin resmı tarıhı-ǵumyrnamalyq zertteýdiń alǵashqy tájirıbesi deýge bolady. Munda onyń qarapaıym aýyldaǵy jasóspirim kezinen bastap, Elbasyna deıingi ómir joly baıandalady.
Kitapta basty nazar N.Á.Nazarbaevtyń saıası ómirbaıanyna aýdarylǵan, ol Qazaqstannyń HH-HHİ ǵasyrlar aralyǵyndaǵy damýy kezinde bolyp ótken dramalyq jáne ádetten tys oqıǵalar men úderisterdiń aıasynda berilgen. Aýqymdy muraǵat materıaldarynyń negizinde ázirlengen ómirbaıan Qazaqstannyń eń bertingi tarıhy boıynsha eleýli qujattama kózi bolyp tabylady. Kitapta fotosýretpen bezendirilgen baı materıaldarmen birge, jeke qujattardyń túpnusqalarynyń kóshirmeleri alǵash ret usynylady. Al munyń ózi oqyrmannyń sýretteletin oqıǵalar aýanyna tolyǵyraq qanyǵýyna septigin tıgizedi.
Bul kitapqa onyń avtory Qazaqstan Respýblıkasy Prezıdenti Keńsesiniń bastyǵy, saıası ǵylymdar doktory, profesor Mahmut Qasymbekov ekeni týraly derek erekshe qundylyq beredi, ol kóp jyldar boıy Memleket basshysynyń tikeleı qaramaǵynda qyzmet atqaryp, prezıdenttik ınstıtýtty zertteýmen kásibı turǵyda aınalysyp keledi. Onyń ǵylymı jáne shyǵarmashylyq qorynda prezıdenttik ınstıtýtqa, N.Á.Nazarbaevtyń saıası qyzmetine arnalǵan ǵylymı monografıalar, oqý quraldary, kóp tomdyq basylymdar, pýblısıstıkalyq jınaqtar, kóptegen maqalalar bar.
Qazaqstan Prezıdenti týraly ǵumyrnamalyq kitaptyń 2012 jyly jaryq kórgen sátinen bastap, tek Otanymyzda ǵana emes, shet elderde de qyzyǵýshylyq týdyrýy kezdeısoq emes. Qysqa merzim ishinde ol orys, aǵylshyn jáne arab tilderine aýdarylyp, jaryq kórdi.
Kitaptyń vengr tilindegi nusqasy Qazaqstan Respýblıkasynyń Vengrıadaǵy elshiliginiń qoldaýymen jaryq kórdi. Onyń Vengrıa Ǵylym akademıasynyń ǵımaratynda ótken tusaýkeserine vengr tarapynan Vengrıa Parlamentiniń Tóraǵasy Shandor Lejak, Vengrıa Parlamentiniń Dýaıeni Ianosh Horvat, Óńirlik damý mınıstri Shandor Fazekash, Qazaqstannyń Vengrıadaǵy qurmetti konsýly Laslo Horvat pen basqa da resmı adamdar, ǵylymı jáne shyǵarmashylyq zıaly qaýym ókilderi, Vengrıadaǵy qazaq dıasporasynyń ókilderi, jýrnalıser men stýdentter qatysty.
Qazaqstan tarapynan kitaptyń avtory Mahmut Qasymbekov, Qazaqstannyń Vengrıadaǵy elshisi Nurbah Rústemov, Qazaqstan Parlamenti Senatynyń depýtaty, Qazaqstan Jazýshylar odaǵy basqarmasynyń tóraǵasy Nurlan Orazalın, Qazaqstan Prezıdenti Keńsesi bastyǵynyń orynbasary Baqytjan Temirbolat, L.N.Gýmılev atyndaǵy Eýrazıa ulttyq ýnıversıtetiniń rektory Erlan Sydyqov, Tuńǵysh Prezıdent kitaphanasynyń dırektory Meıir Eskendirov qatysty.
Kezdesý jyly ári senimdi pikir alysý jaǵdaıynda ótti.Tanystyrylymǵa qatysýshylar Qazaqstan basshysy týraly vengr tilinde jaryq kórgen kitap eki dostas halyqtardyń jaqyndasa túsýi oraıyndaǵy taǵy bir naqty qadam degen ortaq pikirge keldi.
Sáýlebek BİRJAN,
"Egemen Qazaqstan"
