Jyl saıyn adamdar ár túrli sebepterge baılanysty joǵalyp jatady. Ondaı oqıǵalarǵa týystarymen arazdasý, maýsymdyq jumysqa ketý, qumar oıyndary, densaýlyq jaǵdaıy, qylmys belgileri bar jaǵdaılar sebep bolyp jatady, - dep habarlaıdy Qamshy.kz.
Statısıka boıynsha Qazaqstanda 2014 jyly - 5 600 adam, al 2015 jyly 3000 adam joǵalǵan.
2016 jyldyń 6 aıynda elimiz boıynsha Sotqa deıingi tergep tekserýdi tirkeý tizilimine 1806 adamnyń habar-osharsyz ketkeni týraly 1776 habarlama tirkelgen, onyń 747-si erler bolsa, 1059-y - áıelder, onyń 160-y kámelet jasqa tolmaǵandarǵa qatysty materıaldar desek, onyń 102-si qyz bala, 58-i ul balaǵa qatysty bolyp otyr.
Elimizdegi sońy qylmysty ólimmen aıaqtalǵan shýly adam joǵalý oqıǵalary:
Erasyl Áýbákirov, 1992 jyly týǵan.
Astana qalasyndaǵy Medısına Ýnıversıtetiniń stýdenti. İz-tússiz joǵalǵan astanalyq stýdent azaptap óltirilgen. 23 jastaǵy Erasyl Áýbákirovti bir apta boıy izdegen polıseıler onyń múrdesin kómilgen jerinen tapty. Medısına ýnıversıtetiniń 6-shy kýrs stýdentin qaskóıler óltirmes buryn ábden qınaǵan eken. Keıin marqumnyń denesinen qutylý úshin aıaq-qolyn baılap, kómip tastaǵan.
Safar Shakeev, 1991-jyly týǵan.
Safar Shakeevtiń óli denesi Almatynyń Esentaı ózeniniń boıynan tabylǵan. Safardyń qazasyn ákesi kezdeısoqtyq dep málimdedi. Ony izdeýge tikushaq jáne 200-ge jýyq erikti adam jumyldyrylǵan.
19 maýsym kúni túngi klýbqa baryp, sodan qaıta úıine oralmaǵan 33 jastaǵy Baldyrǵan Sybanbaevanyń da óli denesi tabylǵan.
Onyń denesinde zorlyqtyń belgileri bolǵan. Tekserý barysynda marqumnyń týystary ony tanyǵan.
Almaty qalasy turǵyny, Nurshat Rozıevtiń denesi ózennen tabylǵany habarlanǵan bolatyn. Sotaldy tergeý barysynda 25 jastaǵy Almaty turǵyny bankırmen janjaldasyp qalǵannan keıin osyndaı qylmysqa barǵany anyqtaldy. Ol qylmys izin jasyrý úshin Rozıevtiń úıin órtep, máıitin ózenge laqtyryp jibergen. 28 jastaǵy bank qyzmetkerin sońǵy ret dostary 3 qyrkúıekte kórip, oǵan izdeý salǵan bolatyn.
Doldanuly Jarqynbek (1979 j.t), Zarlyhanuly Muqıat (1973j.t), Álimhan Qadylbek (1973j.t)
Almaty oblysy Jambyl aýdanynyń ortalyǵy Uzynaǵash eldi mekenine mal satýǵa kelip joǵalǵan úsh azamattyń deneleri tabylǵan. Qylmyskerler azamattardy Uzynaǵashtan 200 shaqyrymdaı jerge aparyp, qumǵa kómip ketken.
Statısıka
Bıyl ótken jyldary izdeý jarıalanǵan adamdardy qosa eseptegende, 1642 habar-osharsyz ketken adam anyqtalǵan (erler -998, áıelder -644).
Habar-osharsyz ketkenderge qatysty jarıalanǵan izdeýdi toqtatýǵa kóp jaǵdaılarda, ıaǵnı 1 418 jaǵdaıda, olardyń júrgen oryndary anyqtalýy negiz bolǵan, máıittiń jeke basynyń anyqtalýy – 157, olardyń 16-synyń kúsh qoldanyp óltirý belgileri bolǵan máıitter, 27-si sotpen qaıtys bolǵan dep tanylǵandar jáne 40-y merzimi ótýine (10 jyl) baılanysty esepten alynǵandar.
2016 jyldyń shilde aıynyń basyna 2 661 adamǵa habar-osharsyz ketken izdeýde bolsa, onyń 181-i kámelet jasqa tolmaǵandar edi.
Olardyń qatarynda kóbisi 2 031-i nemese 76% erler jáne 630-y nemese 24% áıelder.
Olardyń azamattyqtaryn saralasaq: 2575-i Qazaqstan azamattary,61-i - TMD azamattary, 16-sy alys jatqan shet eldikter jáne 9-ynyń azamattyǵy joq adamdar.
Jas erekshelikterine qarasaq: habar-osharsyz ketken adamdardyń 407-si 18-den 25-ke deıingi jastar, 653-i - 26 men 35, 561-i - 36 men 45, 481-i - 46 men 55, 221-i - 56 men 65, 157-i - 66 men 89 jastaǵylar.
Osy málimetter negizinde habar-osharsyz ketken adamnyń orta statısıkalyq beınesi mynandaı bolyp shyǵady.
Basym jaǵdaılarda ol 30 ben 45 jas aralyǵyndaǵy Qazaqstan respýblıkasynyń azamaty, orta jastaǵy er adam. Derekqor málimetterine sáıkes, joǵalýdyń basty sebebi úıden ketip qalý bolyp tabylady. Bul otbasylyq urys-keris, alkogól ishimdikterin ishý, túrli tabys tabý joldarymen qatar, qylmys belgileri bar jaǵdaılarda joǵalý bolýy múmkin.
