Qazaqstandyq ǵalym, ál-Farabı atyndaǵy Qazaq Ulttyq ýnıversıtetiniń rektory ǵylym men tehnologıa salasyndaǵy ıslamdyq ISESCO syılyǵynyń ıegeri atandy, - dep habarlaıdy Qamshy.kz ýnıversıtettiń baspasóz qyzmetine silteme jasap.

Bilim berý, ǵylym men mádenıet boıynsha Islamdyq uıymnyń halyqaralyq syılyǵy (ISESCO) uıymǵa múshe memleketterdiń ǵalymdaryna bıologıa, hımıa, geologıa, matematıka, fızıka jáne ǵylymı tehnologıalar salasyna sińirgen ǵylymı-ınnovsıalyq eńbegi úshin eki jylda bir ret taǵaıyndalady. Syılyqtyń quramyna sertıfıkat, altyn medal men aqshalaı syıaqy kiredi.

«Bıyl matematıkalyq modeldeý men tehnıkalyq jáne áleýmettik-ekonomıkalyq júıelerdi basqarýda sińirgen eren eńbegi úshin bedeldi marapatqa qazaqstandyq ǵalym, ál-Farabı atyndaǵy QazUÝ rektory, akademık Ǵalym Mutanov ıe boldy. Atalmysh marapat Ǵ.Mutanovtyń ǵylymı qyzmetiniń halyqaralyq dárejede ekeniniń dáleli», - delingen baspasóz qyzmeti taratqan habarlamada.

ISESCO «Islamdyq konferensıa» uıymymen 1979 jyly qurylǵan bolatyn. Búginde ol álemniń 50-den asa memleketiniń basyn biriktirip otyr. Halyqaralyq uıymnyń qyzmeti musylman memleketterindegi mádenıettiń, ǵylym men bilimniń damýyna jan-jaqty qoldaý kórsetýge baǵyttalǵan.