Soltústik Qazaqstan oblysynda bir aptada 30 órt oqıǵasy tirkelgen. Jalpy, jyl basynan beri óńirde 279 órt oryn alyp, 27 mln teńgege materıaldyq shyǵyn keltirilgen. Tilsiz jaýdan 21 adam qaza tapqan, onyń tórteýi bala. 15 azamat túrli kúıik deńgeıimen aýrýhanaǵa túsipti. Mundaı derekterdi SQO TJD baspasóz qyzmeti keltirip otyr.

Tótenshe jaǵdaılar qyzmetkerleriniń aqpary boıynsha, Taıynshy aýdanynyń Keller aýylynda órt qaýipsizdik erejelerin saqtamaǵannan gaz qurylǵysyn paıdalanǵan kezde gaz aýa aralas qospa jarylyp, ol turǵyn úıdiń janýyna ákelgen. Anyqtalǵany, asqanada peshtiń qasynda gaz balony ornalasqan eken.

«Gaz aýa aralas qospa jarylyp, ol turǵyn úıdiń janýyna ákeldi. Bul kezde úı ıesi kire beriste telefonmen sóılesip otyrǵan, al, áıeli aýlada bolǵan. Ot er azamattyń ústine túsip, kıimi janǵan. Laýlaǵan ot úı múlkin búldirip, terezelerdi syndyrǵan. 53 jastaǵy úı ıesi 50% dene kúıigimen ortalyq aýdandyq aýrýhananyń jan saqtaý bólimine jetkizildi», - dep habarlady baspasóz qyzmeti.

Osy tektes oqıǵa M.Jumabaev aýdanynyń Polýdıno aýylynda da oryn alǵan. Munda qyzyl jalynnyń sharpýynan úı túgel janyp ketken. «Abaısyzda shylym shegý 75 jastaǵy petropavldyq qarıanyń ólimine ákep soqty. Tún jarymda bes qabatty úıdiń ekishi qabaty órtengen. Órt aýmaǵy 2 sharshy metr bolǵanymen, saldarynda úı ıesi qaza bolǵan» delingen habarlamada.

Sondaı-aq, Qyzyljar aýdany Kondratovka aýylynda da órt tutanyp, úsh jáne tórt jastaǵy eki sábı gazdan ýlanǵan.

Ótken aptada pishen órtenip, oblys ortalyǵyna órt sóndirýshiler 95 ret shyqqan.

baq.kz