Kóp jyldan beri Ál-Farabı atyndaǵy Qazaq ulttyq ýnıversıtetimen birlesip jumys jasap kele jatqan Kolýmbıa ýnıversıtetiniń tarıhshysy Rafıs Abazov Vatıkannyń qupıa muraǵattarynan Qazaqstannyń belgisiz kartalaryn tapty.

Rafıs Abazov «Rım jáne Alash: mádenı mura» ǵylymı jobasynyń aıasynda muraǵattardy zertteýge shaqyrylǵan bolatyn.

Bul jobany Júrgenov atyndaǵy Qazaq ulttyq óner akademıasynyń rektory, PhD doktor Andreı Hazbolatov jáne «Italıa» bilim berý ortalyǵynyń dırektory, ıtalán tilin oqytýshy Karmıne Barbaro birlese  júzege asyrylǵan.

Ǵalymdar Reseı ımperıasynyń Eýrazıanyń kóshpeli taıpalarymen, sonyń ishinde qazaqtarmen ózara baılanysyna qatysty dálelder tabýǵa úmittendi. Qupıa muraǵattardy zertteý kezinde Qazaqstan aýmaǵyna qatysty kartalar tabyldy.

«Menińshe, bul tabylǵan derekter Qazaq memlekettiliginiń naqty genezısi men damý dınamıkasyn túsinýge kómektesedi. Qazirgi qazaq memlekettiligi 16-17 ǵasyrlarda paıda boldy dep sanalady jáne tarıhshylarda sol kezdegi qazaq taıpalarynyń syrtqy álemmen baılanysy jaıly málimet az. Sonymen birge, ǵalymdar olardyń Qytaı jáne Reseımen qarym-qatynasyna erekshe nazar aýdarady. Alaıda bul kartalar qazaq halqynyń bıleýshileri syrtqy álemmen baılanysty keńinen ornatýy, Ońtústik Azıa , tipti Batys Eýropaǵa deıin baılanys jasaýy múmkin ekenin aıǵaqtaıdy», - deıdi Abazov.

Vatıkannyń qupıa muraǵattaryna ruqsat alý ońaı emes, Abazovtyń qujattarmen jumys isteýge ruqsat alý úshin bir jyl kútýine týra kelgen. Tabylǵan kartalar shamamen 16-17 ǵasyrlarǵa tıesili. Sonymen birge, ǵalym Rım papasynyń tatar-mońǵoldardyń hanyna jazǵan hattaryn tapty.