23-24 qyrkúıekte Mońǵolkúre aýdanynda qazaq kúresinen Úİ kezekti álem chempıonaty ótkizildi, - dep habarlaıdy Qamshy.kz.
Bota tirsek, býra san, atan jilik azamattardyń qarymy men darynyn, jigerin synaıtyn álemdik dodaǵa Qytaı, Reseı, Qazaqstan, Grýzıa, Armenıa, Gresıa, Túrkıa, Mońǵolıa, Ońtústik Afrıka qatarly 22 memlekettiń 23 komandasy qatynasty. QHR namysy úshin Shyńjań balýandar quramasy men Mońǵolkúre balýandar quramasy álemniń ár túkpirinen kelgen alyp kúsh ıelerimen kúsh synasyp, tájirıbe almasty.
«Uıymdasyp istegen, ár istiń bir sáni bar» degendeı, bul retki jarysty Halyqaralyq kúres qaýymdastyǵy, Dúnıejúzilik qazaq kúresi qaýymdastyǵy, İle qazaq kúresi qoǵamdyq birlestigi qatarly uıymdar bas bolyp uıymdastyryp, İle qazaq avtonomıaly oblystyq mádenıet-denetárbıe, radıo, kıno-televızıa mekemesi men İle qazaq avtonomıaly oblysy Mońǵolkúre aýdandyq Halyq úkimeti joǵary deńgeıdegi sán-saltanatpen ótkizdi.
Azıanyń ár qıyrynan, Eýropadaǵy eńseli elder men alystaǵy Afrıkadan at basyn burǵan atan jilik balýandar 60, 70, 80, 90 keli, 90 keliden joǵary salmaq kategorıalary boıynsha jáne tamashalaýshylardyń tańdaıyn qaqtyratyn túıe balýan (buǵan salmaǵy 80 kılogramnan joǵary balýandar erikti túrde qatysady) jarysy boıynsha eki kún boıy boz kilemde beldesip, ózderiniń qazaq kúresi jaǵyndaǵy qarymyn baıqatty. Álemdik dodanyń saltanatty da sándi, ádil júrilýi úshin bas tóreshi, ortadaǵy tóreshi, kilemdegi tóreshi, qaptaldaǵy tóreshi qatarly qazaq kúresiniń qyry men syryna qanyq, qaǵıdalaryn jetik meńgergen halyqaralyq deńgeıdegi tóreshiler tórelik etip, qazaq kúresiniń búk upaı, jambas upaı nómirin berý tásili arqyly jarysty sátti ótkizdi.
Aqtyq synasýǵa joldama alǵan balýandar tehnıkalyq tebin, myǵym kúsh, qaıtpas qajyr arqyly óz salmaǵy boıynsha qarsylasyn alyp ta, shalyp ta kórdi. Sońynda, 60 kılogramdyq salmaqta Qazaqstan balýany Qusman Qyrǵyzbaev birinshi, Qyrǵyzstan balýany Sanjar Osmanalev ekinshi, Úndistan balýany Gúlab Alı Mohsın men Qytaı balýany Nurtaı Nurmuhametuly úshinshi oryndy ıeledi; 70 kılogramdyq salmaqta Qazaqstan balýany Qumar Qyrǵyzbaev birinshi, Qytaı balýany Jalynbek Mádenıetuly ekinshi, Qyrǵyzstan balýany Mırlan Eralev pen Ózbekstan balýany Bahrom Inoıatov úshinshi boldy; 80 kılogramdyq salmaqta Qazaqstan balýany Dáýlet Pahyrıdenov birinshi, Estonıa balýany Georgı Ládókın ekinshi, Grýzıa balýany Zvıad Bazandarashvıl men Armenıa balýany Devıd Sarksıaı úshinshi orynǵa jaıǵasty; 90 kılogramdyq salmaqta Qazaqstan balýany Aıbol Aıtbekuly birinshi, Ózbekstan balýany Shákirjan Arsylanov ekinshi, Estonıa balýany Aleksandr Mármeljúk pen Qytaı balýany Jaıdarbek Serikuly úshinshi orynǵa ıe boldy; 90 kılogramnan joǵary salmaqta Qazaqstan balýany Aıbek Nuǵymanov birinshi, Grýzıa balýany Levanı Matılashvılı ekinshi, Reseı balýany Maksım Shırıaev pen Belorýs balýany Aleksandr Vahavıak úshinshi oryndy ıelendi.
Qazaq kúresinen 6-kezekti álem chempıonatynyń túıe balýany kim bolady dep eleńdesken jurt boz kilemnen kóz aıyrmaı, balýandarǵa dem berip otyrdy. Jankúıerlerdiń jan aıǵaıy balýandardyń jigerin janyp, bekem beldesýge shaqyrdy. Túıe balýan dárejesi boıynsha básekede grýzıalyq Gýram Týshıshvılı túıe balýan ataǵyna ıe bolsa, Belorýssıa balýany Aleksandr Vahavıak ekinshi orynǵa, Qazaqstan balýany Muhıt Tursynov pen Reseı balýany Maksım Shırıaev úshinshi orynǵa ıe boldy.
Osy retki jarystyń túıe balýany atanǵan som bilekti, shymyr tulǵaly Grýzıa azamaty Gýram Týshıvılıdyń dene bitimi men kúres tehnıkasy ózara ushtasyp, jalpaq jurtty jalt qaratty. Qazaq kúresin jetik meńgergen ózge ult balýandaryna qarap, ekpindi de ershimdi qadammen halyqaraǵa bet alǵan qazaq kúresiniń aldaǵy asýy bıik bolaryna senimimiz kámil.
Alymbek Nuralın,
Janbolat Manarbekuly
