Jýrnalıs, "Ýaqyt kórsetedi" Youtube arnasynyń júrgizýshisi Nurseıit Jylqyshybaıdyń Tobylǵytory atty tulpary Semeı qalasynda ótken báıgede top jaryp, júldeli boldy. Jýrnalıske aımaq basshysy Berik Ýálı avtokóliktiń kiltin tabystady. 

Báıge Abaı Qunanbaıulynyń 180 jyldyq mereıtoıyna oraı uıymdastyrylǵan bolatyn. Top báıgeden bólek "Alaman báıgede" Pavlodar qalasynyń, jorǵa jarysynda Qyrǵyzstannyń júırigi top jardy. Júldegerlerdiń barlyǵy kólikti boldy. 

Aımaq basshysy Berik Ýálı mereıtoılyq onkúndik aıasynda toı toılaýǵa emes, oı oılaýǵa, rýhanı, zıatkerlik, tanymdyq, sporttyq sharalarǵa basa mán berilgenin aıtty.

"Jalpy 10 kúndik is-sharalar eldiń bereke-birliginiń arqasynda joǵary deńgeıde ótti dep esepteımin. "Abaı akademıasy" atty ensıklopedıalyq portal ashyldy. Birneshe kitaptyń tusaýy kesildi. Myńnan astam komanda qatysqan "Abaı kýız" ıntellektýaldyq oıyny ótkizildi. Zaǵıp jandar men nashar kóretin azamattarǵa arnalǵan kitaphana iske qosyldy. Búgin ózderińiz kórgendeı, júlde qorlarynyń ár aımaqqa, tipti qyrǵyz eline deıin ketkeni qýantady. Osy rette toıdyń joǵary deńgeıde ótýine atsalysqan oblystyń janashyr azamattaryna alǵys aıtamyn", – dedi ákim.