Ánshilerden basqa aıtylar áńgime joq pa? Kún saıyn osy suraqty qaıtalaýǵa májbúr bolamyz. Telearnalar ánshiden basqa adam joq deı me, áıteýir, baǵdarlamalary da ánshiler jaıly, júrgizýshileri de ánshiler. «Habar» arnasyndaǵy kezekti jańa baǵdarlama da sol taptaýryn taqyrypqa taǵy jabysypty.

1

Qaıda qarasań da (teledıdardy aıtamyn) ártis. Olardan asqan bedeldi, suranysqa ıe jan joq.  Jalpy, ánshilerdiń ózine aıtar ókpe-nazym nól. Olar shaqyrýsyz qalmas úshin shaqyrǵannan qalmaıtyn adamdar. Bar bolǵany sol ǵana. Másele – shaqyrǵyshtarda.

2

Keshe keshke jaqyn «Habar» arnasyn qosyp qaldym. Sóıtsem, jolym bolyp tusaýkeserge tap bolyppyn (shyn máninde 25 qyrkúıek kúni kórsetilgen sannyń qaıtalaýy eken, keıin bildim). Kórermenge jol tartqan sý jańa baǵdarlamanyń ataýy – «Kompromat». Ataýyna qarap erekshe bir dúnıeni kútkenim ras. Dál ne nárse ekendigin dóp basyp aıta almaımyn. Áıteýir ánshiler jaıly kezekti shoý dep oılamaǵanym anyq.

3

Óz basym mýzarttyq Sáken Maıǵazıevti qatty qurmetteımin. Bir ret telefonmen sóıleskennen aq jaqsy adam ekendigi baıqaldy. Biraq men onyń «Toqaly bar ma? Áıelińizben ursysasyz ba? Shynymen de minsiz adamsyz ba? Ańsaǵan qandaı armandaryńyz bar?»  suraqtaryna berer jaýabyn bilgim kelmeıdi. Bul suraqtarǵa jaýap izdeıtin, ánshilerden suhbat alatyn arnaıy gazet-jýrnaldar bar. Arnaıy tipti mýzykalyq arnalar bar. Qalaǵan kezde sol basylymdy satyp alyp oqımyn ne «Gákkýge» aýystyramyn. «Habar» Agenttigi praım-taım ýaqytynda osyndaı «ózekti» máseleni talqylaǵanyn qalamaımyn.

4

Qazaq syn aıtqannan, min tapqannan basqa eshteńe bilmeıdi dep meni bireýler synap otyrǵan shyǵar. Onyńyz da durys. Óz kezegimde qoǵamǵa shynymen de kerek taqyryp týraly tolǵanbaı, qalam tartpaı, jeńil shoý jaıly pikir bildirip otyrǵan ózime ashýlymyn. Biraq, ekranǵa telmirip tárbıe alyp jatqan halyqty oılasam úndemeske bolmady. Daryndy jastarǵa baǵyt-baǵdar berip, baǵyn ashyp, juldyzyn jarqyratyp, ónerdiń úlken sahnasynan kórinýge joldama berý («Jandy daýys», «Mýzart live») – bir basqa, pálenbaı mınýt boıy bir ánshige qıturqy suraqtar qoıý, sony maqsat tutý – bir basqa.

5

Kompromat degenimiz belgili bir adamnyń jasyryp qalǵysy kelgen dúnıelerin dálel-dáıek bolatyn qaǵaz, fotosýret, beınematerıal arqyly jalpyǵa jarıa etý. Sondyqtan kompromatty óner adamdaryna emes eki sóılegen, ýádesinen taıǵan (taý basyndaǵy kotejin saldyrtyp alyp qurylysshyǵa nápaqasyn bermegen), ádepsizdik, dórekilik tanytqan (aldyna jumys surap kelgen qarshadaı qyzdy kofe ishýge kafege shaqyrǵan) halyq qalaýlaryna, bıznesmenderge usyný qısyndyraq bolar ma edi?! 

Jazıra Baıdaly