Muslim.kz saıty «Qabirdiń janynan ótip bara jatqanda bet sıpaý durys pa?» degen suraqqa jaýap beredi.

Paıǵambarymyzdyń (s.ǵ.ý) súnneti boıynsha qabirge kelgen adam sol jerde jatqan árýaqtarǵa Alladan keshirim tilep, duǵa etedi. Bul – saýapty is. Sahıh Mýslımde rıýaıat etilgen hadıste Jábráıil perishte Muhammed Paıǵambarǵa «baqıǵ qabirine[1] baryp ol jerdegi jatqandarǵa «ıstıǵfar» (keshirim tile) et!» degen Qudaıdyń buıryǵyn jetkizedi. Paıǵambarymyz (s.ǵ.ý) Jábireıil aıtqan qabirge kelip, qolyn kóterip duǵa etedi.  Úıge oralysymen Aısha anamyz:«(Qabirdegilerge)Ne deıin?», – dep suraıdy. Sonda Paıǵambarymyz: «(Qabirge barǵanda) bylaı de: «Ýa múmın, musylman qabir ıeleri! Alla Taǵala bizdiń ólilerimizge de, tirilerimizge de raqym etsin. Alla qalaǵan kúni biz de senderdiń qatarlaryńa qosylamyz»[2], – dep jaýap berdi.

Qazaqtardyń qabir qasynan ótip bara jatyp bet sıpaýy Paıǵambarymyzdyń (s.ǵ.ý) osy súnnetinen shyqqan dúnıe. Alaıda, tek bet sıpap qana qoımaı sol jerde jatqandarǵa ishteı Alladan rahym tilegen durys. Sonda sizdiń áreketińiz qur bet sıpaǵandyq emes, Paıǵambarymyzdyń súnnetin oryndaǵandyq bolmaq.

[1] Mádıne qalasynyń ońtústik shyǵysynda ornalasqan sahabalardyń máıiti jerlengen qabyr. Buny «Jánnátýl Baqıǵ» dep te ataıdy.
[2] Mýslım, Kıtabýl Janaız, (974) – 103 hadıs.

Abdýsamat Qasym