“Eline uran bolǵan Er Jánibek” – búgin, ıaǵnı 11 mamyr kúni osyndaı atpen Almatyda RIXOS-Almaty qonaq úıiniń konferensıa zalynda Er Jánibek Berdáýletulynyń 300 jyldyǵyna oraı jaryq kórgen basylymdardyń tusaýkeser rásimi ótti. Bul XVIII ǵasyrda ómir súrgen, qazaq halqynyń jońǵarlarǵa qarsy soǵysynda úlken erligimen, qol bastaǵan batyrlyǵymen eline ańyz, jurtyna saıaly tulǵa bolǵan Er Jánibek batyrdyń 300 jyldyq mereıtoıyna arnalǵan sharalardyń biri. Tursaýkeserde «Er Jánibek – 300 jyl» anyqtamalyq-bıblıografıalyq ǵylymı jınaǵy, Mońǵolıadaǵy qazaq jazýshysy Sultan Táýkeıulynyń «Aqyr Jánibek» romany, sondaı-aq «Kereıde batyr Jánibek» aýdıo-beıne jınaǵy oqyrmanǵa jol tartty.

Kitap tusaýkeserinde ǵalym, synshy, ádebıetshi. Fılologıa ǵylymdarynyń doktory, profesor Tursynbek Kákishev, Dúnıejúzi qazaqtary qaýymdastyǵy tóraǵasynyń orynbasary Talǵat Mamashev, «Er Jánibek» halyqaralyq qorynyń prezıdenti Maqsut Temirbaev, QR Eńbek sińirgen qaıratkeri, aqyn-jyrshy Baıanǵalı Álimjan, tarıh ǵylymdarynyń kandıdaty Janymhan Oshan, «Er Jánibek» halyqaralyq qorynyń vıse-prezıdenti Jeńis Túrkıa, fılologıa ǵylymdarynyń kandıdaty, QR mádenıet qaıratkeri Bazarbek Atyǵaı syndy tarıhshy-jazýshy ǵalymdar men qoǵam qaıratkerleri sóz sóılep, batyrdyń eldik, erlik jáne birtutas Alash eliniń táýelsizdigi jolyndaǵy kúresi jaıynda dáıekti pikirler aıtyldy.

Tusaýkeser sońynda atalǵan qonaqúıde batyrdyń rýhyna arnalyp as berilip, quran baǵyshtaldy.