Elimizdiń jýrnalısıka fakúltetterine  arnalǵan oqý-tájirıbelik "Jýrnalıs" gazeti ál-Farabı atyndaǵy QazUÝ,  jýrnalısıka fakúltetiniń  KMlab zerthanasynda gazeti qaıta shyǵarala bastady. Túrli sebepterge  baılanysty gazeti jumysy toqtatylǵan bolatyn. Araǵa  jyldar salyp, basylym qaıta  jaryq kórýde. Bul týraly fakúltettegi  "Elektrondy BAQ jáne merzimdi basylym" kafedrasynyń meńgerýshisi, profesor Gúlmıra Sultanbaeva facebook paraqshasynda  habarlady. 

   Kafedra meńgerýshisi gazettiń tarıhy týraly: "Jalpy, "Jýrnalıs" gazeti stýdentterdiń shyǵarmashylyq alǵashqy zerthanasy ekeni daýsyz. Bul gazettiń tarıhy tereńde. Sonaý 40-jyldary gazet qolmen jazylyp, qabyrǵa gazeti formatynda jarıalandy. keıin ýaqyt óte "klıshede" terilip, basyldy. Bul gazette T. Amandosov, Q. Bekhojın, T. Qojakeev, M. Barmanqulov, N. Omashev, S. Qozybaev, B. Jaqyp sıaqty ustaz-basshylardyń qoltańbasy qalǵan. 90 jyldary marqum Serik Abdrahmanov aǵanyń asıstenti bola júrip, komúterde verstkalap shyǵardyq. Talaı daryndy shákirtterimizdiń alǵashqy maqala, zametka, óleńderi, fotokollajdary osynda jaryq kórdi. Názıra Berdalynyń óleńderin jıi jarıalap otyratynbyz. Juldyz Ábildanyń maqalalary da jıi jarq etetin" dep   eske  aldy.

Araǵa  jyldar salyp, qaıta  jańǵyrǵan "Jýrnalıs" gazetiniń  ózindik erekshelikterine  de  toqtalyp ótti:  "Arada birshama jyldar ótkende gazetimizge qoldaý kórsetip, zamanaýı ozyq tehnologıada - Intellektýaldy Mashınada basylyp, kóbeıtilip, búktelip, qystyrǵyshpen tistelip shyqqan alǵashqy gazetti 19 mamyrda kópshilik aldynda shyǵaramyz. Konıka Mınolta kompanıasy Eldar, Asqar, Illıarıon sıaqty top-menedjerlerine, sondaı-aq QazUÝ-degi sandaǵan uıymdastyrý, jetkizý, atqarý jumystaryn asa eptilikpen úılestirgen, basqarǵan kompanıanyń PR - menedjeri Malıkaǵa aǵartýshylyq maqsatta materıaldyq kómek kórsetkenderi úshin alǵysymyz erekshe" dep  túıindedi  óz sózin.

Qoǵamdyq oıdyń uıytqysy - jýrnalıs kadrlardy daıyndaýda dál osyndaı kásıbı-tájirıbelik basylymnyń mańyzy zor. Sondyqtan, bolashaq jýrnalıser oqý  ordasy  qabyrǵasynda  júrip, qalamyn ushtaýǵa, tájirıbe jınaýǵa  mol múmkindik  týdy.