"Qaraǵandy oblysynda áskerı merzimdik qyzmet ótep júrgen sarbazdyń jansyz denesi kúzet munarasynan tabyldy. Sarbaz qatań tártiptegi kolonıany kúzetken. Aldyn ala boljam boıynsha 19 jastaǵy Myrzabaı Saparbaev Kalashnıkov avtomatty qarýynan ózin bastan atqan" dep habarlaıdy Tengrinews.kz "Jetinshi arna"telearnasyna silteme jasap.

Qaıǵyly oqıǵa Dolınka aýylyndaǵy túzetý mekemesinde kúndizgi ýaqytta oryn alǵan. Sarbazdyń óli denesi kúzetti almastyrý kezinde tabylǵan. QR İİM İÁ "Ortalyq" aımaqtyq komandovanıesi bastyǵynyń tárbıe jumystary boıynsha orynbasary Murat Atıbaev onyń Ońtústik Qazaqstan oblysynyń týmasy ekenin, ótken jyly jeltoqsan aıynda Almaty qalasynan merzimdik ásker qataryna shaqyrylǵanyn jáne alǵashqy kezde áskerde qyzmet etýden bas tartyp, ata-anasymen sóılesip, túsindirý jumystary júrgizilgen soń qyzmet etýge keliskenin aıtady. Atıbaevtyń sózine qaraǵanda, qaıtys bolǵan sarbazdyń denesine esh zaqym kelmegen, qylmys izi joq jáne kúsh kórsetý bolmaǵan. Sarbazdyń nelikten óz-ózine qol jumsaǵany belgisiz. Qazirgi ýaqytta tekserý jumystary júrgizilip jatyr.

Dese de, KTK telearnasynyń málimetine qaraǵanda, Saparbaevqa baıyrǵy qyzmetkerler tarapynan qysym kórsetilgen bolýy yqtımal. Qaıtys bolǵan sarbazdyń týystary "qaıǵyly oqıǵa aldynda ol anasynan "dembelder" úshin 20 myń teńge men saǵat salyp jiberýdi suraǵan" deıdi. Týystary "ony ólimge ıtermelegen" dep otyr.

Sonymen qosa, telearna bul 6505 áskerı bólimindegi birinshi qaıǵyly oqıǵa emes ekenin málimdedi. Osydan jarty jyl buryn merzimdi áskerı qyzmet ótep júrgen Bekjan Baýyrjanov áskerden qaıtýyna eki kún qalǵanda asylyp qalǵan bolatyn, al bir jyrym jyl buryn Aleksandr Zaısev kúzette turǵan jerinde ózin-ózi atqan edi.