Qazaqstan komýnıstik partıasy (QPK) men Jalpy ulttyq sosıal-demokratıalyq partıanyń (JSDP) jáne qoǵamdyq uıymdardyń ókilderi, saıasatkerler, ǵalymdar qatysýymen 31 mamyr kúni Almaty qalasyndaǵy «Qazaq konsert» zalynda «El bıligin halyqqa qaıtaraıyq» degen uranmen ótken jıynda «jalpyulttyq azamattyq jınalys» quryldy. Bul týraly «Azattyq radıosy» jazdy.
Jıyn barysynda atalǵan azamattyq jınalystyń eki turaqty qurylymy – azamattyq keńes pen tóralqa jumys isteıtini málimdengen. Jıynǵa Qazaqstannyń túrli óńirinen 1000-ǵa tarta adam qatysyp, Qazaqstannyń qazirgi ekonomıkalyq saıasaty men avtorıtarlyq rejımin synaǵan baıandamalar jasaldy. «Azamattyq keńesti» basqaratyn prezıdıým saılanyp, onyń quramyna JSDP lıderi Jarmahan Tuıaqbaı, QPK jetekshisi Ǵazız Aldamjarov, «Aman-saýlyq» úkimettik emes uıymynyń basshysy Baqyt Túmenova, Qazaqstannyń adam quqyqtary búrosy jetekshisi Evgenıı Jovtıs, baspasózdi qorǵaıtyn «Ádil sóz» uıymy basshysy Tamara Kaleeva jáne basqalar kirdi. Aıta keterligi Keńestiń lıderi bolmaıdy, ony osy azamattar birigip basqarmaq.
Uıymdastyrýshylardyń aıtýynsha, azamattyq keńes «prezıdenttiń ókilettikterin shekteý, jergilikti ózin-ózi basqarý júıesin qurý, konstıtýsıalyq sotty qalpyna keltirý, shıkizat óndirýshi keshenderdi kezeń-kezeńimen memlekettiń menshigine qaıtarý» t.b. baǵytta jumys istemek. Jıynǵa qatysýshylar mamyrdyń 29-y kúni Qazaqstan, Belarýs jáne Reseı prezıdentteri qol qoıǵan «Eýrazıa ekonomıkalyq odaǵy týraly» kelisimdi sóz etip, «paıdasynan zıany kóp ıntegrasıany» synaǵan.
