Tilińe ıe bolmasań iri kólemde aıyppul tóleısiń. Endi ár azamat ǵalamtorda jazǵan sózi úshin zań aldynda jaýap beredi, dep habarlaıdy Bnews.kz. Bul jóninde Bas prokýrordyń birinshi orynbasary Iogan Merkeldiń málimdemesinen belgili bolyp otyr. Ol óz sózinde: «Zań eń aldymen ǵaıbat pikir nemese jalǵan dinı aqparat taratqandarǵa qatysty. Kúdikti jazbalar aldymen arnaıy saraptamadan ótedi. Eger bireýge jala jaýyp balaǵattaǵany anyqtalsa, avtory jaýapqa tartylady jáne 500 aılyq eseptik kórsetkish kóleminde aıyppul tóleıdi. Bolmasa 3 aı qoǵamdyq jumysqa tartylady», - dep atap kórsetken.

Tipti ınternettegi jazbanyń astyna adamnyń ar-namysyna tıetin negizsiz pikir jazǵandarǵa 1 mıllıon teńgege jýyq aıyppul salynbaq. Elimizdiń Qylmystyq kodeksine osyndaı jańa bap engizilgeli jatyr. Iaǵnı, aqparattyń jalǵan ekenin bile tura qasaqana qaýeset taratqandar birinshi kezekte jazalanady. Eger pikir bildirýshi qateleskenin moıyndaǵan jaǵdaıda nemese taratqan málimeti shyn máninde dáleldengen bolsa sot joq. Sondaı-aq, Merkel áleýmettik jelilerde jıi synı kózqaras bildiretinderge de toqtaldy. Bas prokýror orynbasarynyń aıtýynsha, jeke pikir qaldyrǵan adamnyń sózi dáıekpen negizdelse jaýapqa tartylmaıdy. Al, belgili bireýden shaǵym tússe tekserý júredi.