Toǵjan esimdi bir qaryndasymyz «Alash aınasyna» hat joldapty. Hattyń mazmunymen tanysa kele yzaǵa da býlyqtyq, uıalyp qyzardyq ta. Oqyrmanmen bóliserimizdi ne bólispesimizdi bilmeı abdyraq qaldyq. «Aýrýyn jasyrǵan óledi» degendi eske túsirip hatty ashyq qoǵam talqysyna salýdy jón sanadyq. Bizdińshe bala-shaǵa tárbıesindegi ákeniń rólin arttyrý kerek.

«Meniń jasym 21-de. Joǵarǵy oqý ornyndarynyń birinde tálimgermin. Qurbylarymnyń aıtýynsha, ańqaýlaýmyn. Adamdarǵa sene berem. Bireýge ǵashyq bolsam, qulaı ǵashyq bolam. Biraq óte qyzǵanshaqpyn. Sol qyzǵanshaq minezimniń kesirinen júrgen jigittermen kóp uzamaı ajyrasyp ketem.

Eń alǵash jigitpen 18 jasymda, ýnıversıtettiń birinshi kýrsynda oqyp júrgende júrdim. Jaqsy dos boldyq. Bir-birimizdi súıdik. Tipti birneshe ret onyń páterine baryp, birge qonyp ta júrdim. Birge jatqanymyz bolmasa, odan árige barǵan emespiz. Bir jyldan keıin ol jigitpen ajyrasyp kettik. Ol ashyq-jarqyn minezdi bolatyn. Únemi qyz bitkenmen qaljyńdasyp, oınap-kúlip júretin. Qurbylarymmen de alysyp oınaı beretin. Maǵan sol áreketi unamaıtyn. Óıtkeni qyzǵanatynmyn. Qyzǵanyp jiı urysatynbyz. Aqyry ajyrasyp tyndyq.

Odan keıin bir jyl jigitpen júrgen joqpyn. Durysyn aıtqanda ǵashyq bolǵan joqpyn. Keıde keshterde unap qalǵan jigittermen bir-eki ret súıiskenim bolmasa... Sóıtip júrgende áleýmettik jeli arqyly basqa qalada oqıtyn bir jigitpen tanystym. Sýret almastyq. Úzbeı hat arqyly sóılesip júrdik. Solaı bir-birimizdi unatyp qaldyq. Bir kúni ol meni izdep kelmekshi ekenin aıtty. Men qarsy bolǵam joq. Jasyryp ne kerek, shynymda aıtsam, qatty qýandym. Aıtqandaı, ol meni arnaıy izdep keldi.

Bizdiń qalaǵa kelgen soń ol páter jaldady. Úsh kún birge qydyryp, birge kıno kórip, birge saıabaqqa baryp serýendedik. Men túske deıin sabaqqa baryp kelem de, qalǵan ýaqytta únemi birge boldyq. Tipti úsh kún birge qondyq. Biraq bóten áreketke barǵan joqpyz. Qurbylarym «bir kórgen adamnyń qasyna qona salǵanyń qalaı» dep renjidi. Biraq men «onda turǵan ne bar» dep olardy tyńdaǵan joqpyn. Rasymen de, onda turǵan ne bar? Adamǵa sený kerek qoı. Al «súıgen adamyńa eki ese sený kerek» dep oılaımyn. Bóten áreket jasap, tósek qatynasyna túsip júrgen joqpyz ǵoı.

Ol jigitpen de bir jyl júrdik. Ol eki-úsh aı saıyn kelip turdy. Kelgende únemi birge bolamyz. Ýaqytymyz óte kóńildi ótetin. Sol kezde ózimdi naǵyz baqytty adam sezinip júretinmin. Biraq qasymnan ketse, «ne istep júr eken, kimmen júr eken?» degen saýal mazalap, qyzǵanatynmyn. Sosyn telefon soǵam. Telefondy kótermeı qoısa, ne bireýmen sóılesip jatsa, urys bastap ketem. Urysymyz jıilip, aqyry ol jigitpen da ajyrasyp kettim.

Qazir qaladaǵy basqa ýnıversıtette oqıtyn bir jigitpen júrip júrmin. Keıde onyń páteri bos bolǵanda, birge qonamyz. Buryn jaı birge qonyp qana júretinbiz. Sońǵy kezde «tósektes bolaıyq» dep qoımaı júr. «Men seni tastap ketpeımin, úılenemin» deıdi. Biraq erteń úılenbeı ketse, qaıtem? Jigitimniń usynysy jaıly bir qurbyma aıtsam, «eger onyń aıtqanyna kónbeseń, erteń-aq seni tastap ketedi» deıdi. Qurbymnyń aıtýynsha jigit-qyzdardyń kópshiligi júrip júrgende tósektes bolady eken. «Tósektes bolýdan qashatyn qyzdardy jigitter kóp uzamaı tastap ketedi» deıdi. Qurbym turmysqa shyqqan birneshe qyzdy mysal etti. Olardyń bári de úılengenge deıin tósektes bolǵan kórinedi.

Qurbymnyń aıtqanynyń da jany bar sekildi. Ótkende páteri bos bolyp, birge qonaıyq degen. Biraq meniń bir jumystarym boldy da bara almaıtynymdy aıttym. Sodan beri jigitim mennen jyraqtap júr. Telefon soqsam áıteýir bir syltaý aıtady. Endi onymen de ajyrasatyn sıaqtymyz. Joq álde onyń usynysyn qabyldaýym kerek pe?»