Elimizdiń kóshi-qon zańnamasyn buzǵany úshin Qazaqstan aýmaǵynan shyǵarylǵan 9 jastaǵy Meıirgúl Ularbektiń ata-anasy vıza rásimdep, esh kedergisiz kele alady. Bul jaıynda QR İshki ister mınıstrligi Memlekettik til jáne aqparat departamentiniń dırektory Almas Sadýbaev málim etti dep habarlaıdy inform.kz
«Meıirgúl Ularbektiń ata-anasy Qytaı Halyq Respýblıkasynyń azamattary jáne olar aǵymdaǵy jyldyń 8 tamyzynda Almaty qalalyq mamandandyrylǵan aýdanaralyq ákimshilik sotynyń qaýlysymen belgilengen merzimde elden shyǵyp ketýden jaltarǵany úshin ákimshilik jaýapqa tartyldy. 14 tamyzda olar Qazaqstannan ketti. Qazirgi ýaqytta İİM tarapynan olardyń Qazaqstanǵa kelýine eshqandaı shekteý joq. QHR-daǵy Qazaqstan Respýblıkasynyń Elshiliginde vıza rásimdegen jaǵdaıda olar Qazaqstanǵa esh kedergisiz kele alady. Joǵaryda atalǵan QHR azamattary turaqty turý máselesimen júgingen emes», - dedi Almas Sadýbaev.
Esterińizge sala ketsek, keshe 9 jastaǵy Meıirgúldiń İshki ister mınıstri Qalmuhambet Qasymovtyń qabyldaýynda bolyp ata-anasynyń Qazaqstan zańnamasyn buzǵany úshin el aýmaǵynan shyǵarylǵandyǵyn aıtyp, kómek suraǵanyn jazǵan bolatynbyz.
