Keshe, elimizge ataqty kınorejısser Ermek Tursynovtyń «Melochı jıznı» atty kitabynyń tusaýkeseri Ulttyq kitaphananada ótti. Kitaptyń birneshe basylymyn rejıser Ulttyq kitaphana qyzmetkerlerine syıǵa tartyp, úlken alǵysyn bildirdi. Tilshi mamandyǵyn bitirgen rejıser óziniń jazýshylyq qyzmetin mektep qabyrǵasynda júrip bastaǵan eken.
«Mektepte oqyp júrgenimde buzyqtaý bala edim, bilim kórsetkishim de tym joǵary emes edi. Qazaq tilinde bolsyn, orys tilinde bolsyn jazǵan shyǵarmalaryma eshqashan joǵary baǵa alǵan emespin, bálkim, balalyq shaqtyń qyzyǵymen mán berip qaramaǵan bolarmyn. Anam ádebıet pániniń muǵalimi bolyp jumys istegen. Ol kisi jazýshylyqpen aınalysqandy jaqsy kóretin, sodan men de anamnyń yqpalynan jazýshylyqqa bet bura bastadym», - dep, rejıser óziniń jazýshylyqqa, tilshi qyzmetine qalaı kelgenin baıandap berdi.
«Men tilshi bolamyn dep oılaǵan joqpyn. Bizdiń aýylda Konslagerde otyryp shyqqan bir kisi bolatyn, ol úsh ret qashyp úsh ret ustalǵan, sodan ony atý jazasyna keskennen soń tórtinshi ret qashyp shyǵyp, sol boıy ustatpaı ketken. Sol adam jaıly ózimniń tyrnaq aldy maqalamdy jazdym. Keıinnen ol maqalam jurttyń nazaryna iligip, «Lenındik» gazet betterinde jaryq kórdi. Oqýshy kezimde shyǵarmadan oń baǵa alyp kórmegen men úshin bul jaǵdaı úlken jańalyq boldy. Kıoskilerde satylyp jatqan gazet basylymynyń birneshe danasyn satyp aldym da mekteptegi muǵalimderime maqtanyshpen kórsettim. Bul maqalamnan keıin de birneshe taqyrypta jazyp shyǵarǵan bolatynmyn. Sodan bir kúni Qaskeleńniń baspa isiniń dırektory habarlasyp «Kelińiz de gonoraryńyzdy alyp ketińiz» dedi, biraz ýaqyt ań-tań bolyp turyp qaldym. Bardym, aqshamdy aldym, biraq sol kezdegi sezimdi sózben aıtyp jetkize almaımyn. Mektepti bitirgen soń QazUÝ-dyń jýrnalısıka mamandyǵyna tapsyryp birinshi jyly qulap qaldym da, ekinshi jyly oqýǵa qabyldandym. Solaı solaı ózimniń tilshi retindegi kereramdy bastadym».
«Jazýshylyqqa bet burǵansha men fýtbol komandalarynyń birinde oıynshy da bolǵanmyn. Ol kezderi fýtbolǵa degen qyzyǵýshylyǵym erekshe edi, ózimdi, tipti, bolashaqta fýtbolıst retinde elestetetinmin», - dep Ermek Tursynov óziniń basqa da qabiletterin aıtyp ótti.
Ótken ómirinen biraz derekter bere otyryp, kitap jazýǵa qalaı kelgendigine de toqtaldy.
«Eń alǵash shaǵyn-shaǵyn áńgimelerimdi ınternet jelisindegi saıttardyń birinde jarıalap júrdim. Sol saıttyń ózinde biraz oqyrman jınalyp qaldy. Bir kúnderi ózimniń qasymda birge júrgen dosym osy jazbalarymnyń basyn qosyp bir kitap qylyp shyǵaraıyq dep oı tastady. Uzaq oılanǵanym joq, nege shyǵarmasqa dedim. Sodan jazbalarymnyń barlyǵyn jınap, taǵy da biraz qosyp, artyq jerlerin alyp, óńdep, búgin, mine, sol týyndymnyń tusaýkeserin ótkizip jatyrmyz».
Sonymen qatar, rejıser Ermek Tursynov aldaǵy josparlarynan da habardar etti.
«Jazýshylyqqa bet burǵanmen, bul kınodan alshaqtap kettim degen sóz emes. Qazirgi tańda «Kınomehanık» degen jańa kınonyń túsirilimin bastaıyn dep jatyrmyn, jas shamasy birazǵa kelip qalǵan qarıalarǵa kastıng jarıalap, kınomnyń keıipkerin izdeý ústindemin. Aldymen túsirilim Býdapesht qalasynda ótedi, keıinnen elimizge kelip jalǵastyramyz. Kınomnyń mazmuny ázirge qupıa bolsyn, jaryqqa shyqqannan keıin sizdermen taǵy da bir bas qosamyz degen úmittemin».
Qamshy portaly Ermek Tursynov myrzaǵa aldaǵy ýaqyttarda qalamy qurǵamasyn dep sáttilik tileıdi. Otandyq sapaly týyndylardyń kóbeıgenine biz árdaıym qýanyshtymyz.
Qamshyger: Labıhan Nazerke
