Belgili telejúrgizýshi, tilshi Asqat Sadyrbaı Miss Kazakhstan baıqaýyna qatysqan arýlarymyzdy synǵa alyp, ol joba jaıly óz oıyn jalpaq jurtqa málimdedi. Telejúrgizýshi bul jaıly pikirin Facebook-tegi paraqshasynda jazǵan bolatyn.

«Miss Kazakhstan baıqaýyna qos qoldap qarsymyn. Onyń bizge túkke de paıdasy joq. İsh kıimmen álemniń saxnasyna shyǵyp ádemi arý degen ataqqa talasý ne teńimiz? Qazaq qyzynyń syr tartar sulýlyǵy, ádemiligi talaılardy baıaǵyda-aq tańǵaldyrǵan, moıyndatyp qoıǵan, qazir de shetelden kelgishtep ketkender ony qaıta-qaıta aıtyp moıyndap júr ǵoı. Sonda qarakózderimiz nesimen sulý dep bir sát oılanyp kórińizshi. Olar tazalyǵymen, páktigimen, ınabattylyǵymen, ıbalylyǵymen, tárbıesimen, mádenıetimen sulý. Bizdiń qyzdar –bizdiń qaryndastarymyz, ápkelerimiz, analarymyz, qudasha-baldyzdarymyz, qaıynbıke-jeńgelerimiz. Oılanaıyq. Olarǵa kýpalnık kıgizip saxnaǵa shyǵaryp abyroı tappaımyz. Mıss Kazaxstansyz-aq barlyq qyz ádemi, barlyǵy bas júldege laıyq. Bul sulýlyq baıqaýynyń ar jaǵynda qandaı saıasat jatqany beseneden belgili. Doǵarmasaq tektiligimizge syn. Tegi baıqaýsyz bolmaıdy deseńizder ózimizdiń baıaǵy «Qyz syny» degen jap-jaqsy baıqaýdy jańa formatta qaıta jańǵyrtýǵa bolady. Jylda osy, qatysatyn qazaq, ony kitap oqymaıdy, nadan dep mazaq etetin de qazaq. Olarǵa kúlgenshe jaǵdaıdy túzeıikshi. Jastardyń, ásirese ádemi qyzdardyń qoǵamdaǵy róli Mıss Kazaxstanmen shektelmeıtinin uǵyndyraıyqshy, túsindireıikshi erte bastan, mektep jasynan jaqsyǵa úıreteıikshi, kitapqa qyzyqtyraıyqshy. Al, mynaý arsyzdyqty doǵaraıyq. Qazir kúlkige qalǵan da , oǵan kúlgen de uıalmaıtyn zaman boldy ǵoı. Ondaıǵa qulaq úırendi, endi et ólmesin. Esimizdi jıaıyq. Synaı bergenshe bir adam bolsa da tamshydaı úles qossyn. Ózimizdi ózimiz ǵana túzeımiz. Ózgeniń oǵan basynyń aýyrǵany qansha?!», - dep jazady  Asqat Sadyrbaı.