Qazaqstannyń birneshe qalasynda Táýelsizdiktiń 25 jyldyǵyna oraı dombyrashylar fleshmoby ótti, - dep habarlaıdy tengrinews.kz

Myńǵa jýyq adam Qurmanǵazynyń "Saryarqa" kúıin oryndady. 

Mysaly, Qaraǵandy oqýshylary, stýdentteri jáne kásibı aspap sheberleri - barlyǵy 100-ge jýyq dombyrashy - sınhrondy túrde "Saryarqa" kúıin oryndady. Uıymdastyrýshylardyń aıtýynsha, mundaı shara elimizdiń biraz óńirinde bir ýaqytta bastalǵan. 
"Saryarqa" kúıi Petropavlda da oryndaldy. Onda 50 dombyrashy qatysty - Nazarbaev zıatkerlik mektebiniń oqýshylary, fılormonıa ártisteri, sonymen qatar, oqýshylar men muǵalimder qatysty. 

Pavlodarda Qurmanǵazynyń kúıi iri saýda ortalyǵynda oryndaldy. Munda Pavlodar mýzyka kolejiniń 25 jas dombyrashysy kúı shertti. Uıymdastyrýshylardyń aıtýynsha, saýda ortalyǵy naǵyz konsert zalyna aınaldy, bul shara adamdardyń ulttyq qundylyqqa jaqyn bolýy úshin istelgen. 

Semeıde osy fleshmobqa Nazarbaev zıatkerlik mektebiniń oqýshylary qatysty - 30 dombyrashy jáne 20 bıshi. Dombyrashylar "Saryarqa", "Adaı" jáne "Balbyraýyn" kúılerin oryndady. Sonymen qatar, oqýshylar saýda ortalyǵyna kelýshilerdi "Saǵyndym elim" kompozısıasyna bıleýimen tańǵaldyrdy. 

Óskemende bul shara Olga Rypakova atyndaǵy sport kesheninde ótti. Mundaǵy bastama úlken konsertke aınaldy. Oǵan 600-ge jýyq adam qatysty. 

Osyndaı shara Aqtaý qalasynda da ótken. Onda Óskenbaev atyndaǵy oblystyq fılormonıanyń stýdentteri men qyzmetkerleri qatysqan. Fılormonıa dırektorynyń orynbasary Jańylsyn Mýjıevanyń aıtýynsha, Qurmanǵazynyń "Saryarqa" kúıin oryndaýǵa 40 mýzykant qatysqan. Shara "Aqtaý" saýda ortalyǵynda ótkizilgen. 
 

, ,