Qazaqstan Respýblıkasynyń Prezıdenti Nursultan Nazarbaev QR Táýelsizdiginiń 25 jyldyǵy qarsańynda eldiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi jáne belsendi qoǵamdyq qyzmeti úshin azamattardyń bir tobyna memlekettik nagradalardy tabystady, dep habarlaıdy Baq.kz

Memlekettik nagrada alǵandar qatarynda tanymal saıasatkerler, óndiris, bıznes, bilim berý, densaýlyq saqtaý salalarynyń kórnekti ókilderi, áskerı qyzmetshiler, quqyq qorǵaý organdarynyń qyzmetkerleri, sportshylar, soǵys jáne eńbek ardagerleri, mádenıet jáne ǵylym qaıratkerleri bar.

«Barshańyzdy alda kele jatqan sáýleli merekemiz – Táýelsizdik kúnimen shyn júrekten quttyqtaımyn. Bul – qazaq eliniń jahanǵa tanylǵan barlyq ıgiligimizdiń bastaýy bolǵan eń ulyq, basty merekemiz. Sizder osyndaı aıtýly kúnniń qarsańynda joǵarǵy marapat mártebesine jetip otyrsyzdar. Bul jeke azamattar arqyly barsha halqymyzdyń istegen eńbegine degen baǵa bolady. Kez kelgen el jurttan eleýli ónerimen, máıekti mádenıetimen erekshelenedi. Bul rette talantty týyndy tutas ulttyń rýhanı qazynasyn baıyta túsedi. Osyǵan oraı, búgin ádebıet pen óner salasyndaǵy memlekettik syılyqtardy tapsyrǵaly turmyz. Aqordanyń tórinde jınalǵan barshańyz úshin bul erekshe mereıli sát dep bilemin. Qýanyshtaryńyz qutty bolsyn», - dedi Memleket basshysy.

«Qazaqstannyń Eńbek Eri» ataǵy Qazaqstan Respýblıkasyn ekonomıkalyq, áleýmettik-gýmanıtarlyq damytýdaǵy asa úzdik jetistikteri úshin «Ulttyq neırohırýrgıa ortalyǵy» AQ basqarma tóraǵasy S.Q.Aqsholaqovqa jáne Qostanaı oblysynyń «TPK «Qarasý» JSHS bas dırektory A.J.Tursynovqa berildi.

Sondaı-aq, Prezıdent qolynan İ dárejeli «Barys» ordenimen Prezıdent Ákimshiliginiń basshysy Á.R.Jaqsybekov, Joǵarǵy sott tóraǵasy Q.Á.Mámı, İİ dárejeli «Barys» ordenimen «Ulttyq shtattyq komandalar jáne sport rezervi dıreksıasy» RMQK nusqaýshy-sportshysy Z.R.Gabıdýllına, «Qazaqstan Respýblıkasy Ulttyq ǵylym akademıasy» RQB prezıdenti M.Jurynov, Ulttyq qaýipsizdik komıtetiniń tóraǵasy K.Q.Másimov, Qazaqstan Respýblıkasynyń Reseı Federasıasyndaǵy Tótenshe jáne ókiletti elshisi M.M.Tájın, Prezıdent janyndaǵy Memlekettik basqarý akademıasynyń ınstıtýt dırektory Z.L.Fedotova, İİİ dárejeli «Barys» ordenimen kompozıtor A.Qorazbaev, «Nur Otan» partıasy tóraǵasynyń birinshi orynbasary M.A.Qul-Muhammed marapattaldy.

«Parasat» ordenimen Qazaq ulttyq horeografıa akademıasynyń basshysy P.Asylmuratova, QR ÁDSM mınıstri T.Dúısenova, Astana ákimi Á.Isekeshev, QR Mádenıet jáne sport mınıstri A.Muhamedıuly nagradtaldy. Sondaı-aq, «Dostyq», «Qurmet», «Eńbek dańqy» ordenderi tabys etildi.

Qazaqstan Respýblıkasynyń Qurmet gramotasymen 539 adam nagradtaldy. «Qazaqstannyń eńbek sińirgen qaıratkeri» qurmetti ataǵy ǵylym, mádenıet jáne áleýmettik salanyń 53 kórnekti ókiline berildi.

Áskerı jáne qyzmettik boryshyn úlgili atqarǵany, zańdylyq pen quqyqtyq tártipti qamtamasyz etýde, eldiń ulttyq qaýipsizdigi men qorǵanys qabiletin nyǵaıtý kezinde kórsetken erligi men qajyrlylyǵy úshin áskerı qyzmetshiler men quqyq qorǵaý organdary ókilderiniń bir toby İ jáne İİ dárejeli «Dańq» ordenimen, İ, İİ jáne İİİ dárejeli «Aıbyn» ordenimen, «Erligi úshin» jáne «Jaýyngerlik erligi úshin» medaldarymen marapattaldy.