7 jeltoqsan kúni "Nur Otan" partıasynyń Respýblıkalyq qoǵamdyq qabyldaý bólmesinde QR İshki ister mınıstri Q.Qasymovpen ótken qabyldaýǵa 9 jasar qyz Meıirgúl Almaty qalasynan kelip, ata-anasynyń vıza merzimi ótip ketýine baılanysty bes jylsyz kele almaıtyn etilip elden tysqary jerge shyǵarylǵanyn, óziniń Almatyda jalǵyz qalǵanyn aıtyp, áke-sheshesin qaıta oraltý týraly mınıstrden kómek suraǵany jaıly Qamshy portaly jazǵan bolatyn.
Osy máselege baılanysty, 8 jeltoqsan kúni QR İshki ister mınıstrligi Memlekettik til jáne aqparat departamentiniń dırektory Almas Sadýbaev «... Qazirgi ýaqytta İİM tarapynan olardyń Qazaqstanǵa kelýine eshqandaı shekteý joq. QHR-daǵy Qazaqstan Respýblıkasynyń Elshiliginde vıza rásimdegen jaǵdaıda olar Qazaqstanǵa esh kedergisiz kele alady» dep 9 jasar Meıirgúlge úmit syılaǵan edi.
Alaıda, jaǵdaı biz oılaǵannan múldem basqasha bolyp shyqty. Úrimjidegi Meıirgúldiń anasy Oralhanǵa telefon arqyly habarlasqanda, ol bul málimetti joqqa shyǵardy. Osy másele tóńireginde «Nur Otan» partıasynyń qyzmetkeri Aýyt Muqıbek óziniń Facebook-tegi paraqshasynda jarıalady:
«Meıirgúldiń ata-anasy Qytaıǵa barǵan soń, Úrimjidegi Qazaqstan konsýldyǵynan 2016 jyldyń 22 tamyzynan bastap, 2017 jyldyń 21 tamyzyna deıin bir jyldyq Qazaqstanǵa ótý vızasyn alǵan. Biraq, konsýdyq bazadaǵy ákimshilik jaýapqa tartylǵan degen málimetke súıenip, olardyń vızalaryna «joıyldy» degen tańba basyp tastaǵan. Sol sebepti olardyń Qazaqstanǵa qaıtyp kele almaı otyrǵanyn aıtady. Onyń ústine, Oralhan ekinshi balasyna júkti eken. Qazaqstanda bosanǵysy keletinin aıtyp, kómek surap otyr...
Qazaqstan Respýblıkasynyń Úrimjidegi konsýldyǵymen telefon arqyly baılanysqy shyǵyp kórip edik, tildesý múmkin bolmady.
Bul másele boıynsha «Nur Otan» partıasy aınalysyp jatqan kórinedi, nátıjesi ne bolar eken? Ony aldaǵy ýaqyttarda biletin bolamyz.
Qazir osy ákimshilik quqyq buzýshyqlyq jazasyna tartylyp, Meıirgúl sekildi týmalarynan bólinip qalǵan jandardyń sany az emes.
Mysaly, senator Murat Baqtıarulynyń 6 qazanda QR İshki ister mınıstrligine depýtattyq saýal jiberip anyqtaýynsha, 2015 jyly jalpy 307 etnıkalyq qazaq elden tys jerge shyǵarylypty.
2016 jyldyń alǵashqy toǵyz aıynda 199 qandasymyz jazaǵa tartylyp, óz eline qaıtarylypty.
Al, 2014 jylǵy kórsetkish budan da kóp bolýy múmkin!
Buryn bir márte ákimshilik quqyq buzǵan sheteldik azamat jazaǵa tartylyp, óz eline qaıtarylatyn bolsa, ótken jyly qaıta qabyldanǵan Zań jobasynda bul norma birneshe ret buzǵan daǵdaıda elden shyǵarylady dep ózgertildi («Halyqtyń kóshi-qony týraly» Zańnyń 49-bap, 5-tarmaǵy).
Soǵan qaramastan, bıylǵy – 2016 jyldyń alǵashqy toǵyz aıynda 199 qandasymyzdiń jazaǵa tartylyp, óz eline qaıtarylýy – jurtty qatty alańdatyp otyr.
Mine, Qazaqstan Táýelsizdiginiń 25 jyldyǵy merekesine oraı Ult Kóshbasshysy Nursultan Nazarbaevtyń tapsyrmasymen 30000 qylmyskerge raqymshylyq jasaý týraly Zań jobasy qabyldandy.
Sondyqtan, Qazaqstan Respýblıkasynyń QR İshki ister mınıstrligi de 2013 jylǵy 10 jeltoqsanda qabyldanǵan «Kóshi-qon» Zańynyń tym qatańdyǵyn eskere otyryp, Qazaqstan Respýblıkasynyń Ákimshilik quqyq buzýshylyq týraly kodeksine sáıkes kóshi-qon zańnamasyn buzǵany úshin, 2014 jyldyń 1 qańtarynan beri Sot sheshimimen elden tys jerge shyǵarylǵan sol qandastarymyzǵa da bir márte raqymshylyq jasasa, óte durys hám saýap bolar edi!»
9 jasar qyzdyń taǵdyry barlyǵymyzdy da alańdatyp otyr, sonymen qatar sol sekildi qanshama jandar óz jaqyndarynan qol úzip, tipti tildese de almaı jatyr. Qazaq balasyn shetke teýip, jetimin jylatpaǵan el edi, al qazirgi tańda ata-anasynan tirideı kóz jazyp qalyp, kórise almaı júrgen jandar qanshama. Qushaǵymyz keń, alaıda, bóten ultqa keń qushaǵymyzdy jaıa bermes buryn óz qandastarymyzdy ózge elde qan qaqsatpaı elge oralýyna kómek qolymyzdy sozaıyq!
Qamshyger: Nazerke Labıhan
