Búgin bir týar tulǵa Baýyrjan Momyshulynyń týǵan kúni. Osydan 106 jyl buryn dúnıege er júrek batyr, ekinshi dúnıejúzilik soǵystyń dańqty jaýyngeri, halyq qaharmany, qazaqtyń myqty qolbasshysy keldi. Ol surapyl soǵysta óziniń er júrek batyrlyǵy, qaıtpas qaısarlyǵymen, tapqyrlyǵymen erekshelene bildi. Alaıda, onyń maqsaty ózgelerden erek bolý emes. Onyń tabıǵaty, bolmysy, týa bitken mineziniń ózi erekshe. B.Momyshuly talaı aqyn, jazýshynyń qalam terbeýine túrtki bolǵan nar tulǵa. Batyrdyń ómirinen syr shertetin kitaptar da az emes. Sol kitaptardyń ishinen batyrǵa arnalǵan qyzyqty estelikterdi usynamyz.
(Z.Ahmetova. «Shýaqty kúnder»)
.... Baýyrjan Kýbadan kelgende bastyǵy Momyshulynan ıntervú ákel degen bir jýrnalısiń «Meni Baýyrjanǵa jumsaǵansha tordaǵy arystannyń jalynan bir sıpap qaıt dep buıyryńyz» degeni bar....
(Z.Ahmetova. «Shýaqty kúnder»)
...Mezgil túske taıap qalǵan. Gaz plıtasyna shaı qoıylyp, qaınaǵansha búgingi gazetterdi qarap otyr edim, esik synyp keterdeı tarsyldady. Úıde jalǵyz otyrǵan soń ári ádettegiden tys myna tarsyldyń ózgesheligi shoshytyp jiberdi. Tapa-tal tús bolsa da esikke kelip:
Bul kim? – dedim.
Men! Atańmyn! Bar, kıin! - dedi kún kúrkiregendeı ún esiktiń syrtynan. Alǵashqy qoryqqanym qoryqqan ba, zárem ushty. «Bar, kıin» degen sózdiń baıybyn birden uǵa almaı, úıde kıip júretin halatymnyń túımesin bir salyp, bir aǵyttym. Kıim salatyn shkafqa júgirdim. Sasqalaqtap, kıimderimdi julmalap, álekke tústim de qaldym. Degenmen ózime-ózim «sabyr-sabyrlap» ústime jeńi uzyn kóılek, basyma oramal, aıaǵyma shulyq taýyp kıdim. Baryp esik ashyp, ata-babamnyń saltymen ıilip sálem saldym.
– Baqytty bol, balam! - dep qolyn bolar-bolmas basyma tıgizip, bólmege kirdi. Ata jalǵyz emes, qasynda bir kisi bar, óń-túsiniń qandaı ekenin kórgenim joq, birden basymdy kóterýge batylym jetpedi...»
(Á.Nurshaıyqov. «Aqıqat pen ańyz»)
...Osy arda Baýyrjannyń tilshilerdi qabyldaýyna baılanysty jurt ańyz etip aıtatyn eki oqıǵa oıyma sap ete qaldy. Birde Momyshulyna radıodan magnıtafonyn arqalap tilshi keledi. Tilshi shashyn áıelshe qoıa bergen jas jigit eken.
Áı sen kimsiń? – deıdi Baýyrjan ony kórgen boıda.
Radıojýrnalıspin, aǵaı. Sizben sóıleseıin dep kelip edim.
Óziń áıelmisiń, erkekpisiń, men sonyńdy aıt dep turmyn saǵan.
Erkekpin, aǵaı.
Krýgom! – deıdi Baýkeń oǵan ejireıip. Sasqan jigit urshyqsha aınalyp keıin burylyp, esikke qarap turady.
Sen erkek bolsań onda shashyńdy erkekshe qıdyryp kel. Marsh! Degen eken...
Ázirlegen: Ásem Álmuhanbet
