Tarıhı qujattardan belgili, 1917 jyldyń 13 jeltoqsany - ekinshi jalpyqazaq seziniń aıaqtalǵan, qazaq dalasynyń túkpir-túkpirinen kelgen sıez delegattarynyń tarqaǵan kúni. Al, Alash qaıratkerleriniń jekelegen estelikteri men qujattary Alashorda úkimetiniń qurylǵan kúni dep jeltoqsannyń on ekisin kórsetedi. Al, sıez delegaty, matematık Álimhan Ermekovtiń maqalasy úkimettiń jasaqtalǵan ýaqyty men avtonomıa týraly qýanyshty habardyń qaı saǵattarda aıtylǵanyn naqtylaı túsedi: «Dekabrdiń 12-kúni, tús aýa, saǵat 3-te dúnıege «Alash» avtonomıasy kelip, azan shaqyrylyp at qoıyldy. Alty Alashtyń balasynyń basyna aq orda tigilip, Alash týy kóterildi... Jasasyn Alash avtonomıasy!» («Saryarqa» gazeti, 22 qańtar, 1918 jyl.). "Qamshy" portaly  12 jeltoqsan "Alashorda memleketiniń qurylǵanyna 99 jyl!" atty materıal jarıalap, oqyrmandaryn quttyqtaǵan edi.

1918 jyldyń aqpan aıynan bastap Lenınniń dekretimen Reseı grıgorıan kúntizbesine kóship, 13 kún alǵa bir-aq sekirdi. 31 qańtardan keıingi kún 14 aqpan bolyp belgilendi. Soǵan oraı, Á.Ermekov jazyp otyrǵan 12 jeltoqsan - búgingi 25 (12 jeltoqsan + 13 kún) jeltoqsanǵa sáıkes keledi.

Bul eseppen Jeltoqsannyń 25-i – qazaqtyń tuńǵysh Respýblıkasy - Alash Respýblıkasy qurylǵan kún qutty bolsyn Alash urpaǵy!