Talǵardaǵy sel shaıyp ketken sý qubyryn qalpyna keltirýge 64 mln teńge qajet. Tengrinews.kz jańalyqtarynyń jazýynsha bul týraly Almaty oblysy ákiminiń orynbasary Tynyshbaı Dosymbekov aıtqan.

Onyń málimetinshe, 28 shilde kúni turǵyn úı-kommýnaldyq sharýashylyq, qurylys basqarmasy, sáýlet jáne qalalyq sý arnasy ókilderiniń qatysýymen komısıa otyrysy ótti. Zaqymdanǵan sý qubyrynyń uzyndyǵy 500 metr ekeni anyqtaldy. "Keshe Gúldala aýyldyq eldi mekenindegi tereń uńǵymany qalpyna keltirý kerek degen ortaq tujyrym jasadyq. Sý taratqysh júıesi buzylǵan, úsh nasosy jumys istemeı tur, sý sorý kezinde 50% sý beriledi. Sý taratý qubyrynyń sel shaıyp ketken 500 metrin qalpyna keltirý úshin 64 mln teńge qajet bolady. Biraq jańbyr, sel kezinde laı sý júretin bolady", - deıdi oblys ákiminiń orynbasary. Sol sebepti sý uńǵymadan beriletin bolsa, onyń quny joǵary bolatynyn aıtady.

Ázirshe tórt eldi mekenge 18 sý tasýshy jumys isteıdi. Sý shaıǵan "Spýtnık" lagerine deıingi jolǵa ýaqytsha jóndeý júrgizý úshin taǵy 60 mln teńge qajet bolatyn kórinedi. Selden kelgen jalpy shyǵyn tolyq eseptelmegen. Eske salatyn bolsaq 17 shilde kúngi tabıǵı apat kezinde Talǵar aýdanyna qarasty birneshe eldimken aýyzsýsyz qaldy. Sel aǵyndary orman sharýshylyǵyndaǵy 3 úıdi, «Djerjınes» jumys istemeıtin balalar lageriniń qurylysyn, «Spýtnık» pıoner lagerine aparatyn avtojoldar ýchaskelerin, ózen arnasyna jaqyn ornalasqan dámhananyń 2 jazǵy terassasyn, sondaı-aq «Almaty qalasy – Qorǵas qalasy» jolyndaǵy avtomobıl kópirin shaıyp ótti.  

Qamshy-aqparat