Qazaqstandyq kásipqoı boksshy Qanat Islam óziniń kezekti, 18-shi jekpe-jegin 7 tamyz kúni Kolýmbıanyń Barrankıláda qalasynda ótkizedi, - dep habarlaıdy Tengrinews.kz tilshisi.
Otandasymyzdyń kelesi qarsylasy kolýmbıalyq Fıdel Manterrosa bolmaq. Fıdel osy ýaqytqa deıin kásipqoı bokstyń sharshy alańyna 43 márte shyǵyp, 32 kezdesýinde jeńiske jetse, 9 kezdesýinde jeńilip, 1 kezdesýde teń túsken. 26 ret ol kezdesýde ýaqytynan buryn aıaqtaǵan.
Al Qanat Islam bolsa qazirge deıin 17 kezdesý ótkizip, barlyǵynda jeńiske jetken. Otandasymyz óziniń 14 kezdesýinde qarsylasyn nokaýtqa jibergen. Astana ýaqytymen tańǵy 08.00-de bastalatyn bul jekpe-jekti jergilikti arnalardyń biri tikeleı taratady.
Eske salaıyq, otandasymyz óziniń sońǵy jekpe-jegin mamyr aıynda kolýmbıalyq Fransısko Korderoǵa qarsy ótkizip, kezdesýdiń úshinshi raýndynda jeńiske jetti. Bul jeńisiniń arqasynda Qanat Búkilálemdik boks qaýymdastyǵynyń (WBA) mamyr aıyndaǵy reıtıńi boıynsha 11-satydan 9-orynǵa kóterildi. Al Boxrec.com portaly qazaqstandyq boksshyny álemdegi eń qarqyndy boksshylardyń tizimine qosty.
Aıta keteıik, Qanat Islam 1984 jyly 13 qyrkúıekte Qytaıda dúnıege kelgen. 2010 jyly ol Qazaqstanǵa kóship kelgen. Keıbir derekter boıynsha, ol qazir Almaty oblysynyń Qarasaı aýdanynda turyp jatyr.
Ol kásipqoı boksqa 2012 jyly aýysty. Buǵan deıin Qanat áýesqoı boksta Qytaı atynan Beıjiń Olımpıadasyna qatysyp, qola medal alǵan edi. Elge oralǵan soń WSB serıasynda óner kórsetetin elordalyq "Astana arlandary" komandasynyń namysyn qorǵady. Búginde boksshy AQSH-tyń Florıda shtatyndaǵy Pahokee bazasynda daıyndalyp júr. Tengrinews.kz
(Áýelgi taqyryp: Qanat Islam kelesi jekpe-jegin kolýmbıalyq boksshyǵa qarsy ótkizedi)
