Biraq olardyń tergeýge alynǵanyna áriptesteri men týystary narazylyq tanytty dep habarlaıdy ktk.kz. Maqsat Shláshev pen Ermek Shoqanov buıryqtan esh jaltarǵan joq deıdi olar. Qaıta, sol kezde qol qýysyryp otyrǵan aımaqtaǵy laýazymdy tulǵalar jazalansyn deıdi prokýratýra aldyna jınalǵandar. 

-Aqtóbede ádildik joq. Eki polıseıdi otyrǵyzǵysy keledi, 8 jylǵa deıin. Basqalary qaıda?

Janushyra aıqaılaǵan bul kelinshek joldasynyń jazyqsyz ekenine senimdi. Aqtóbeniń jergilikti polısıa qyzmetin basqarǵan kúıeýi Maqsat Shláshev pen orynbasary Ermek Shoqanovqa jazda sodyrlar soıqan salǵanda qol qýsyryp qarap otyrdy degen aıyp taǵylǵan. Lańkester áskerı bólimdi basyp alǵanda, tártip saqshylarynyń ishke kirip atyspaǵanyna basshylar kináli dep tanylypty. Biraq munymen olardyń áriptesteri kelispeıdi. Óıtkeni, İshki ister mınıstriniń buıryǵy boıynsha jergilikti polısıa qyzmetine tek sol nysandy qorshap, turǵyndardy jolatpaý júktelgen eken.

Nurǵalı Qanatov, polısıa qyzmetkeri:

-Sol jerge adam jibermeýimiz kerek boldy.  Ári qaraı İshki İster departamentiniń bastyǵy bar, orynbasary bar osylar qımyldaý kerek.

Oblystyq prokýratýra aldyna jınalǵan alpystaı adam qylmystyq istiń jarty jyl ótkende qozǵalǵanyna da kúmándanyp otyr. Aıtýlarynsha, tergeýshiler aımaqtaǵy Ulttyq qaýipisizdik jáne İshki ister departamentteri basshylarynyń basqa aımaqqa qyzmet aýystyrýyn kútken kórinedi.

Sansyzbaı Júginisov, Aqtóbe qalasynyń turǵyny:

-Túıemen túıe súıkense ortasynda shybyn óledi deıdi. Bul ortasynda júrgen shybyndar. Bul kúsh qurylymdarynyń qyrqysýy. Eger kinálilerdi izdeıtin bolsa KNB qaıda qarady?

Aıqaıdy estip, oblystyq ishki ister departamenti bastyǵynyń orynbasary da keldi. Tek, áriptesterine qoldaý bildirý emes, jınalǵan jurtty taratý úshin jetken eken.

Qanybek Jaqsyǵalıev, Aqtóbe oblystyq İİD bastyǵynyń orynbasary:

-Bárimizge de áriptes qoı. Halyq jınalǵan jerge qoǵamdyq tártipti buzbaýdy suraımyn. Tarańyzdar.

Esiginiń aldyna jınalǵandarǵa mán-jaıdy prokýrorlar da ashyp aıtpady. Tek tergeýdi júrgizip jatqan solar dep, Bas prokýratýraǵa siltedi.

Jergilikti polısıa qyzmetiniń qos basshysy tergeý kezinde qamaýǵa alynbaıtyn boldy. Olardy kepilmen bosatqan. Ol úshin Maqsat Shláshev kóligin tikse, orynbasary Ermek Shoqanov baǵaly múlki bolmaǵandyqtan baldyzynyń temir tulparyn surap alǵan.