Sanaýly kún buryn aıtys janashyry Júrsin Erman áleýmettik jelide jazba jarıalap, aıtystyń jaǵdaıy týrasynda Imanǵalı Tasmaǵambetovke muńyn shaqqan edi. Endi Júrsin Erman jetekshilik etetin WWW.AITYSKER.ORG saıtynyń baılanys bólimi jaýaptysy, aıtysker aqyn Shuǵaıyp Sezimhan aıtystyń telearnalardan kórsetilmeı jatqanyn jazyp dabyl qaqty. Salmaqty oı men suraqqa toly maqalany «Qamshy» portaly da oqyrman nazaryna usynady.

Byltyr elimizdiń túkpir-túkpirinde Respýblıkalyq jáne Halyqaralyq on úsh aıtys ótipti. Ókinishke oraı, sol on úsh aıtystyń bireýi ǵana ulttyq arnadan tóbe kórsetti. Onyń ózin «júnin julǵan taýyqtaı» kúıge túsirgenderin kózimen kórgender biz aıtpaı-aq jaqsy biletin shyǵar. Dese de kórsetpegennen jaqsy ǵoı dep shúkirshilik etkenimiz de jón-aý… Al qalǵan 12 aıtystyń kópshilikke kókjáshik arqyly jol tartpaýynyń mánisin biz de uqqan joqpyz, áıteýir efırden alastatylǵanǵa uqsaıdy.

Naýryzdyń 12 kúni Almatyda ótken «Asqaqtaı ber Almaty» atty aıtysty Almaty arnasy túsirgen bolatyn. Teledıdarǵa telmirgenimizdi qaıteıik, kórsetken joq.

Shildeniń altysyndaǵy Astananyń tól merekesine oraı ótken «Baǵanaly ordam- basty ordam» atty aıtysty túsirgen «Habar» arnasynyń sol kezdegi dırektory Rınat Dýmanuly Kertaev: «Aıtysty jaqynda «Habar» arnasynan kespeı, qımaı tolyq kórsetetin bolamyz» degen ýádesinde turǵan joq. Ol aıtys ta efırden ǵaıyp boldy.

Jeltoqsannyń 3-4 kúni Almaty qalasynda jyldyń qorytyndy «Altyn dombyra» aıtysy ótti. Bul aıtysty túsirýge esh telearna yqylas tanytpaǵan soń Almaty qalasy ákimshiliginiń ótinishi boıynsha «Eýrazıa» telearnasy túsirip, 31 jeltoqsan men 1-2 qańtar kúnderi kórsetemiz degen bolatyn. Jarnamamen solaı jar salǵanymen, qalyń qazaq taǵy da mássaǵan, «men aldandym» degendeı taǵy bir sanyn soǵyp qala berdi. Eń soraqysy, bul joly beriletin aıtystyń ýaqytynda aıtys emes, aıtystyń ornyna kógildirler kólbeńdep konsert berdi. Bul sonda aıtysty mazaq qylý ma ne?

Qytaıda qazaq tilindegi habar taratatyn «Shyńjan 3» jáne «Shyńjan 8» telearnalary men «Shyńjan halyq radıosy», arǵy bettegi aǵaıyndar arasynda ótken aıtystardy mindetti túrde kórsetip otyrady eken. Al óz elimizde tól ónerimizdi áspetteýdiń ornyna, telearna bitken aıtys dese at tońyn ala qashady. Osynshama tól ónerden bezetindeı basymyzǵa ne kún týdy?! Neni asyra siltep aıtyp qoıyp edik? Basqasyn aıtpaǵanda «qazaqtyń qulaǵy», «ulttyń únjarıasy» dep júrgen «Qazaq» radıosy da aıtystan irgesin aýlaq saldy. Byltyr aıtys «IýNESKO-nyń mádenı muralar tizimine endi»,- dep álemge jar saldyq. Biraq sodan aıtystyń kósegesi kógergeni shamaly. Sonda búgingi tańda kógildir ekranǵa ený úshin, adam túsinbeıtin sózderge jazylǵan án salyp, maqtaý men madaqtaýlar aıtý kerek pe? Áıtpese on úsh aıtystyń bireýi ǵana jaryqqa shyǵatyndaı aıtys jerge qarap turǵan joq edi ǵoı. Joq álde, ólgen soń ulylary týraly aýyz toltyryp aıtatyn baǵdarlama ashyp joqtaýǵa kirisetin telearnalarǵa aıtys ta mindetti túrde «qaıtys» bolýy kerek pa?

Shuǵaıyp Sezimhan, aıtysker aqyn