76 jasyna qaraǵan shaǵynda qazaqtyń kórnekti jazýshysy, Markestiń áıgili «Júz jyldyq jalǵyzdyǵyn» aýdarǵan aýdarmashy, qalamger Keńes Iýsýp dúnıeden ozdy. Bul týraly jurtshylyqqa áleýmettik jeliden aqyn Dáýletkereı Kápuly estirtti.

Keńes Silámhanuly Iýsýp (Túsip) 1941 jyly 30 maýsymda Shyǵys Qazaqstan oblysynyń Tavrıa aýdanyndaǵy Baımur aýylynda dúnıege kelgen. Óskemen qalasyndaǵy Jambyl atyndaǵy qazaq orta mektebin 1958 jyly bitirgennen keıin, Semeıdegi ózenshiler ýchılıshesin tamamdap, Joǵarǵy Ertis keme sharýashylyǵynda eńbek etedi. Qazaq memlekettik ýnıversıtetiniń jýrnalısıka fakúltetin bitirgen. Shyǵys Qazaqstan oblystyq «Komýnızm týy» gazetinde ádebı qyzmetker, bólim meńgerýshisi, «Sosıalısik Qazaqstan» gazetinde ádebı qyzmetker, bólim meńgerýshisi, jaýapty hatshy, «Qazaqstan kommýnısi» jýrnalynyń bólim meńgerýshisi, «Juldyz» jýrnalynyń bólim meńgerýshisi bolyp isteıdi. Memlekettik basqarý organdarynda jaýapty qyzmetter atqardy. Qazaqstan Respýblıkasynyń Prezıdenti Baspasóz qyzmetiniń bas sarapshysy bolǵan.

«Jalyn» baspasynan «Aqıqat sapar» (1977), «Qarashadaǵy kóktem» (1981), «Ohapka polevyh svetov» (1983) povesteri men áńgimeleriniń jınaqtary, «Jelqaıyq» kitaby («Elorda», 2000) shyqty. Sonymen qatar onyń termınologıa, qazaq tilinde is júrgizý máselelerine arnalǵan «Qujat tili» kitaby 2001 jyly Pavlodar oblystyq «Altyn til» baǵdarlamasynyń aıasynda jaryq kórip, «Jalyn» baspasy uıymdastyrǵan jabyq báıgeniń ekinshi júldesin aldy.

Sondaı-aq «Qazaqstan» jáne «Atamura» baspalarynan «Anyqtama sózdigi» (1992), «Eki tilde is júrgizý» (1994) kitaptary jaryq kórdi. G.G.Markestiń «Júz jyldyq jalǵyzdyq» romanyn (1983), jas bolgar jazýshylarynyń povesteri men áńgimeleriniń jınaǵyn («Gúljazıra», 1987) aýdaryp bastyrdy. «Qazaqstannyń eńbek sińirgen qaıratkeri» qurmetti ataǵynyń ıegeri (2000).

 «Qamshy» portaly ujymy marqumnyń jaqyndaryna qaıǵyra kóńil aıtady.