Dintanýshy Murtaza Júnisuly qoǵamdaǵy biraz máselelerdiń basyn shalyp, qytaılardyń Qazaq eline sonshalyqta qumartýynyń sebebin jáne maqsatyn aıqyndap berdi. Bul týraly dintanýshy Facebook áleýmettik jelisindegi paraqshasynda jazady. Sonymen qatar Aspan asty eliniń mıllıardtaǵan halqyn tańqaldyryp, aýzyna qaratqan ári talantty ánshi Dımash Qudaıbergenovtiń jeńisine qatysty da birshama synı pikirler qaldyrdy.
"Dımashtyń Qytaı jurtshylyǵyna tanymal bolyp jatqanyna qýanyp otyrmyz. Ol qandaı jarys, bul inimiz Qazaqstannyń atynan resmı túrde qatysyp jatyr ma, kim jibergen, qalaı baılanys ornatqan, túk bilmeımin, biletinder aıtar. Byltyrlary Sabına qaryndasymyzdyń sulýlyǵy Qytaı jurtyn dúr silkintti dep taǵy da máz boldyq, maqtandyq. Biraq, shynymen de osylar qýanatyn nárseler me?!? Qytaı azamattarynyń nazary qaıta-qaıta Qazaqstanǵa aýǵany jaqsy ma? Maǵan túsiniksizdeý bolyp jatyr...
Qytaılardyń maqsaty oryndalǵan eken, bizdiń kópshilik muny qur án baıqaýy jáne qazaqtyń shynashaqtaı balasynyń baǵynyń janýy dep qabyldap úlgeripti. Óz elinde neshe túrli tosqaýylǵa ushyrap, joly bolmaǵan jas qazaq balasynyń talantyn Qytaı eli moıyndap jatyr, netken ádiletti qytaılar, jaqsy halyq eken, qazaqqa jany ashıtyn halyq eken ǵoı, qorqatyndaı eshteńeleri de joq eken ǵoı, osy bekerden beker úreılenip júrippiz qytaılardan t.b. degen pikirlerdi oqyp jatyrmyn. Másele, Dımashta da emes, onyń daýysy men talantynda da emes, ol medaldiń bizge kórinip turǵan júzi. Biraq, myna konkýrs arqyly Qazaqstan qoǵamynyń, ásirese qazaqtardyń Qytaı eline, qytaı halqyna degen kózqarasy aıtarlyqtaı ózgerip ketti, polıttehnologtardyń kózdegeni de osy bolǵan shyǵar. Munaı ken oryndarynyń aıtarlyqtaı bóligi qytaılardyń qolynda, 51 zaýytyn buzyp jınap Qazaqstanǵa ákep ornalastyraıyn dep jatyr. Qazaq qyzdaryn boıdaq qytaılarǵa uzatý jobasy júrip jatyr. Qazaqstannan aýylsharýashylyǵy nysanasy bolyp tabylatyn jerlerdi satyp alý nemese jaldaý maqsattary aıqyn. Shyńǵysqannyń kınosy men serıaldary osydan onshaqty jyl buryn alǵashqy pıar jobalarynyń biri retinde tıimdi júzege asyryldy. Kórermen jyly qabyldap, astyńǵy sanaǵa Qytaı kınomatografıasynyń oń ımıji ornalastyryldy, tipti qytaısha úırene bastańdar degen sózderdi estidik. Endi osy án baıqaýy taǵy bir ret keremet kúshti, baı jáne ádiletti Qytaı eli túsinigin sanaǵa quıyp berdi. Qýanyńyzdar, qýana berińizder!
Men sizderge aıtaıyn, eger keremet bir ǵalym baýyrymyz shyǵyp, ǵylymı jańalyq ashsa osyndaı jańǵyryq shyqpas edi, bar ǵoı az da bolsa otandyq ǵalymdar, qaısybirin estip júrmiz, ólgeni ólip jatsa da halyq bilmeıdi ǵoı! Feısbýkta ǵylymı jańalyqtardyń óstip qyzý talqylanǵanyn kórdińiz be?! Al ánshiler men boksshylar týraly bolǵanda she?! Qazaqty tanytyp júrgen, qazaq úshin eńbek etip, ter tógip júrgen tek osy kisiler sıaqty. Keshirińiz, siz aýyrǵanda dáriger izdeısiz ánshi emes, jumysqa barǵanda jumysyńyzdy sapaly isteý kereksiz kim bop isteseńizde, sizge jumysta án aıtqyzbaıdy ǵoı. Árıne, óner de sport ta kerek-aq, biraq biz osyndaı buqaraǵa tez kórinetin, shoý-bıznes, juldyz kategorıalaryn qatty qumartyp, ómirge kerekti óńge salalardy bolsa laıyǵynsha qunttamaı kele jatqan sıaqtymyz...
Qazir ne kóp ánshi kóp, bıshi kóp, akter men aktrısa kóp... Osy Dımash keremet án aıtady dep bizdiń elimizdegi qandaı naqty problemalar sheshiledi? Mysaly, ózińizdiń jeke ómirińizde, aınalańyzda... eshteńe de ózgermeıdi, bul bir shoý, uıymdastyrýshylar da aqymaq emes qoı, olardyń da bir kózdegen maqsattary bar bolar, óte safdil (naıvnyı) bolmaıyqshy! Nege japon, káris, aǵylshyn, nemis ánshiler qatyspaıdy?! Sonsoń qazaqty álemge tanytý degendi qalaı túsinemiz osy?! Qyzdarymyz shetinen sulý, uldarymyz shetinen jińishke daýyspen keremet án aıtady dep pe?!? Bul qate pikir. Biz qazaqty bilimdiligimizben, ónimdiligimizben, eńbekshildigimizben, joǵary tehnologıalyq ónimderimizben, ıntellektýaldy potensıalymyzben ǵana shynaıy tanyta alamyz. Eger shoý-bıznespen bir el tanylatyn bolsa Gollıvýdtan da kóp fılm shyǵaratyn Úndistan tanylyp, eń baı da damyǵan elge aınalar edi ǵoı. Úndistanda 700 mln adamnyń dárethanasy joq, ishetin taza sýy joq, biraq ánshi de, bıshi de, kıno óneri de solarda...", - deıdi Murtaza Júnisuly.
