Aqtóbede jumys isteıtin sheteldik ınvestor Gennadıı Bels QR prezıdentine jazǵan hatynda salyq komıteti men sotqa shaǵymdanǵan dep jazady diapazon.kz. Ol únemi ózgerip turatyn zańdar men úlken kólemdegi aıyppuldar jáne ınvestorlardyń qala men oblys ákimderdiń qabyldaýyn jarty jyldap kútetinine kóńili tolmaıtynyn jetkizdi.
«Men Germanıa azamaty 1-shi toptaǵy múgedekpin. «Brıg» JSHS ıesi jáne basshysy bolǵanyma 25 jyl toldy. Qazaqstan azamattaryn jumys ornymen qamtamasyz ettim. Jyl saıyn 450 mıllıon teńgeden astam qarjy salyq jáne t.b sebeptermen mindetti tólemderge ketedi. Bizdiń kompanıa qaıyrymdylyqqa kóp qarjy bóledi. Onyń ishinde áleýmettik máselelerdi sheshý, Aqtóbeni abattandyrý jáne qalanyń syrtqy kórinisin jaqsartý bar. Jeke ózimde jáne men basqaratyn kompanıanyń ofshorla shoty joq. Tipti jeke aqshamnyń ózin qazaqstandyq bankterde saqtaımyn.
Nursultan Ábishuly, sizdiń sheteldik ınvestorlardy tartý maqsatynda jumsap jatqan kúsh pen eńbegińizdi kórip qýanamyn. Biraq sheneýnikterdiń áreketi men sot júıesindegi zańsyzdyqtardy kórip sheteldik ınvestor jáne Qazaqstanda 25 jyl boıy jumys istep júrgen adam retinde erteńgi kúnime senimsizdikpen qarap qana qoımaı, ózime jáne kásibime qaýip-qater bar ekenin sezemin. Aqtóbelik sot jáne memlekettik kiris departamentiniń qyzmetkerleri sizdiń qupıa nusqaýlyqtaryńyzdy alǵa tartyp, salyq tólemin jasaǵanǵa deıin zańsyz jáne negizsiz ústeme aqshalar men aıyppuldardy tóletedi. Osylaısha búdjetti toltyryp otyr. Meniń oıymsha, olar jemqorlyqqa jaǵdaı jasaýda. Sheshimder memlekettiń múddesine emes, Qazaqstan ekonomıkasyna zardap ákelýge negizdelgen.
Aqtóbe oblysyndaǵy memlekettik kiris departamentiniń qyzmetkerleri jasandy túrde salyq boıynsha 19 mıllıon teńgege bereshek etip jáne ústeme aqshany 7 mıllıon teńgege eseptedi. Sot hattamasynda somma 3 ese kóp bolyp shyqty. Aıyppuldardy tekserý nátıjesine emes, hattamadaǵy dáıeksiz kórsetilgen sommaǵa negizdelip belgilendi. Prokýror buǵan kóz juma qarady.
2014 jyldyń 12 naýryzynda sheteldik kompanıa «Brıga»-ny alkagol ishimdikterin satý barysynda taýar belgisinde zańsyzdyqtar boldy dep sotqa shaǵym túsirdi. Birinshi jáne kelesi sot ınstansıalary onyń ishinde Joǵarǵy sot «Brıg» JSHS qyzmetin zańdy dep tapqan. Alaıda osyǵan uqsas iste Joǵarǵy sot alqasy basqa sheshim qabyldady. Kásipker kompanıasynyń jumys istep jatqan 5 jylynda óz múddesi men sottardaǵy basqa zań buzýshylyqtarǵa qatysty 20 márte sotqa júgingen.
«İske asýy múmkin emes normatıvti-quqyqtyq aktiler ne úshin qabyldanady? Jemqorlarǵa jaqsy jaǵdaı jasap berý úshin be? Álde kásipkerlikti joıý úshin be? Kásiporynnyń bolmashy qatelikteri úshin ákimshilik jazaǵa tartatyn mundaı normalar ne úshin oılap tabylǵan? Investısıalaýǵa qatysty sheshim qabyldaǵanda ınvestor Qazaqstandaǵy salyq júktemesi, eńbek zańnamasy sekildi saýaldardy barlyǵyn qarastyrady. Saraptap bolǵannan keıin ınvestor ekonomıkanyń qandaı da bir salasyna ınvestısıa quıa ma, álde joq pa sony sheshedi. Alaıda qala men oblys ákimimen ınvestısıalyq nemese kásipkerlikti damytý jáne keńeıtýge qatysty suraqtardy kelisý úshin jarty jyl kútesiń. Osydan keıin ınvestorlar úshin qandaı jaqsy jaǵdaı týraly aıtýǵa bolady. Osy faktterdiń barlyǵy Qazaqstandaǵy ınvestısıalyq klımatyna jaǵymsyz áser etedi. Sizdiń sózderińizdi keıbir jerlerde estimeıdi nemese sizdiń bedelińizdi túsirý úshin ádeıi ınvestorlarǵa nashar jaǵdaı jasaıdy. Men kóptegen sheteldik kásipkerlermen sóılesemin. Olardyń kóbi Qazaqstan ekonomıkasyna ınvestısıa salǵysy keledi. Alaıda jetildirilmegen jáne jemqorlyq jaılaǵan sot júıesi, muqıat oılastyrylmaǵan jáne únemi ózgerip otyratyn zań men baqylaýshy jáne sot organdarynyń bassyzdyqtary ınvestorlardy qashyrady» deıdi ınvestor.
Aýdarǵan: Ásem Álmuhanbet
