«Qamshy.kz» portaly buǵan deıin etnıkalyq qazaqtarǵa vızany berý, qalpyna keltirý jáne  uzartý týrasynda birneshe materıal jarıalady. Onda Qazaqstan Respýblıkasynyń zańyna sáıkes etnıkalyq qazaqtardyń vızaǵa qatysty barlyq memlekettik baj salyǵynan bosatylatyny jazylǵan. Osydan keıin redaksıamyzǵa kámelet jasqa tolmaǵan, Qazaqstanda turaqty tirkeýi bar eki balasynyń vızasyn uzarta almaı júrgen azamat habarlasty. Qazir Astana qalasynda turady. Oǵan kóshi-qon basqarmasynda 16 jasqa tolmaǵan balalardyń vızany uzartýǵa qajetti 68 myń teńgeni tóleý kerektigin aıtqan. Eki balasyna 140 myńǵa jýyq aqshany tóleı almaıtynyn aıtady qandasymyz.

Máseleniń mán-jaıyn anyqtaý úshin QR İİM hat joldap, resmı jaýap aldyq. Oǵan sáıkes Qazaqstan Respýblıkasynyń «Halyqtyń kóshi-qon» týraly  Zańda 1-babtyń 28-shi tarmaǵynda shetelde turaqty turatyn ulty qazaq sheteldik nemese azamattyǵy joq adamdar etnıkalyq qazaq sanatyna jatatyny kórsetilgeni jáne Qazaqstan aýmaǵynda turaqty turýǵa ruqsaty bar sheteldik etnıkalyq qazaqtar sanatyna jatpaıdy, tıisinshe memlekettik baj salyǵyn tóleýden bosatylmaıdy degen jaýap keldi.

Qazaqstanda turaqty tirkeýi joq balany mektepke, balabaqshaǵa ornalastyryp, dárigerge kórsetip t.b sharýalardy atqarý qıyn. Al turaqty tirkeýi bolǵan jaǵdaıda etnıkalyq qazaqtar múlde basqa máselemen betpe-bet keledi. Redaksıamyzǵa habarlasqan azamattyń eki balasy bar jáne balalarynyń vızasyn uzartý úshin árqaısysyna 68 myń teńgeden tóleýi tıis. 136 myń teńgeni árkimniń qaltasy kótere bermeıtini anyq. Al odan da kóp balasy barlar qaıtpek? Olardyń jaǵdaıy tipten qıyn. Shetelden kelip, Qazaqstanda ornyǵyp alǵansha biraz ýaqyt, kúsh-qaırat pen qarajat kerek.  Azamattyqty alý úshin de kóptegen tabaldyryqty tozdyrady. Osy rette tarıhı otanyna oralǵandarǵa qujattardy rásimdeý men oǵan qajetti baj salyǵynda jeńildikter bolsa degen tilegimiz bar.

Qamshyger: Ásem Álmuhanbet