Parlament Májilisindegi Halyqtyq Komýnıser partıasynyń fraksıasy  bılikke qarsy kóshege shyǵýǵa, narazylyqtar aksıasyn jasaýǵa ıtermelemese de ashshy shyndyqtardy aıtyp, ekonomıkalyq jaǵdaıymyzǵa shynshyl saraptar jasap qoıady. Osy fraksıanyń depýtaty Aıqyn Qońyrov jýyrda bılik aqparattarynyń jalǵandyǵyn aıtyp, betin shıedeı qyldy. Atap aıtqanda, resmı statısıka 2007 jyldan beri kúnkóris mınımýmynan tómen turatyn qazaqstandyqtardyń úlesi jyldan jylǵa tómendep, 2,5 paıyzǵa deıin azaıǵanyn aıtady. Buǵan nanatyn bolsaq bizdegi kedeılerdiń úlesi AQSH pen Eýropanyń úlesinen de azaıyp ketipti.  Tipti, jaqsy ómir súrip jatyr ekenbiz-aý... Alaıda, deıdi komýnıs, qazaqstandyqtardyń ortasha eńbekaqysy 2007 jyldan beri únemi azaıýda. Ótken, 2016 jyly ol 416 AQSH dollaryna deıin quldyrap, Iran, Qytaı, Meksıka sekildi halqy kedeı turatyn damýshy memleketterden de tómen túsip ketkenin aıtady. Jalpy halyq osylaı kúızelip jatqanda kedeılerdiń sany neniń sebebinen azaıýy múmkin?

    Bulaı bolýy múmkin emes, jalpy halyqtyń jaǵdaıy quldyrap jatqanda kedeılerdiń sany eshqashan azaımaıdy. Endeshe resmı statısıka da ótirik, ony qoldanatyn bıliktiń sózi de ótirik bolyp shyǵady. Osy órge bastyrmaıtyn ótiriktiń bılikke ne keregi bar, deı kelip, Aıqyn  Qońyrov odan da halyqtyń joǵyn toltyratyn joldar izdeý kerek qoı. Sonyń ishinde kedeıshilik shegi kúnkóris mınımýmyna teńestirilýi kerek degen talap qoıyp,  jáne onyń standartyn jasaýǵa kómek berýge de ázir ekenin aıtyp, Premer-Mınıstrge saýal joldady.

S.ELEÝ, sarapshy