Búgin tańerteń Venadan issapardan oralǵan Omýrbek Tekebaevty Bishkek áýejaıynda ustap, tergeýge áketken. Keıin bılik onyń 48 saǵatqa ustalǵany týraly habarlady dep jazdy Azattyq.
Qyrǵyzstannyń ońtústigindegi Osh qalasynda búgin el astanasynda ustalǵan «Ata Meken» opozısıalyq partıasynyń parlamenttik fraksıasy lıderi Omýrbek Tekebaevty jaqtaıtyn jıyrmaǵa jýyq adam memlekettik ulttyq qaýipsizdik komıteti ǵımaraty aldyna jınalyp, narazylyq aksıasyn ótkizgen. Budan soń jıynǵa qatysýshylar baspasóz máslıhatyn ótkizip, bılikten «saıası qýǵyndy» toqtatýdy talap etken. Eger talaptary oryndalmasa narazylyq aksıalary jalǵasatyny týraly málimdegen.
Qazir Bishkektegi memlekettik ulttyq qaýipsizdik komıteti ǵımaraty aldynda Tekebaevty qoldaýshylardyń narazylyq aksıasy jalǵasyp jatyr. Opozısıalyq depýtatty qoldaý sherýi Jalalabad oblysy Bazarqorǵan aýdanynda da ótken. Oǵan qatysýshylar aksıany erteń jalǵastyratyndaryn aıtyp taraǵan.
Sonymen birge Tekebaevty jaqtaıtyn júzge jýyq adam Talastan Bishkekke jolǵa shyqqany týraly aqparat tarady.
Budan bir kún buryn bılik Omýrbek Tekebaevqa qatysty qylmystyq kodekstiń «alaıaqtyq» jáne «jemqorlyq» baptary boıynsha is qozǵaǵany belgili bolǵan. Tekebaevtyń ózi Avstrıada júrip Azattyqtyń suraǵyna bergen jaýabynda ol qylmystyq is týraly beıhabar ekenin aıtqan edi.
Sondaı-aq, Qyrǵyzstanda 2010 jylǵy shildeden 2011 jylǵy jeltoqsanǵa deıin ýaqytsha prezıdent mindetin atqarǵan saıasatker ári dıplomat Roza Otýnbaeva Bishkekte búgin ustalǵan parlamenttegi «Ata Meken» opozısıalyq partıasy fraksıasynyń lıderi Omýrbek Tekebaevty qoldaý aksıasynda sóz sóılegen. Ol eldegi saıası kúshter Qyrǵyzstannyń qandaı jolmen jyljıtynyn talqylap, keńesýi qajet dep málimdegen. «Ózara aıyptaýdy doǵaryp, keıingi balalarymyzǵa ne qaldyratynymyzdy oılanýymyz kerek. Eldegi barlyq saıası kúshterdi keńesýler bastaýǵa shaqyramyn» degen Roza Otýnbaeva.
Keıinnen belgili bolǵandaı Aqpannyń 26-syna qaraǵan túni mılısıanyń arnaıy bólimshesiniń qyzmetkerleri 10 adamdy ustaǵan. Olar búgin tańǵy saǵat úsh kezinde Venadan oralǵan «Ata Meken» partıasy parlamenttik fraksıasy jetekshisi Omýrbek Tekebaevty Bishkek halyqaralyq áýejaıynda ustaǵan bıliktiń isine narazylyq bildirmek bolǵan.
Aıta ketsek, Omýrbek Tekebaev 2005 jyly sol kezdegi Qyrǵyzstan prezıdenti Asqar Aqaev pen 2010 jyly Qurmanbek Bakıev qyzmetterinen ketken kezde belsendi áreket etken qyrǵyz saıasatkerleriniń biri boldy. 2010 jyly shildede Qyrǵyzstan Ýaqytsha úkimeti tóraǵasynyń orynbasarlyǵyna taǵaıyndalyp, konstıtýsıalyq reformalardy júrgizýge jaýapty konstıtýsıalyq keńes tóraǵasy qyzmetin atqarǵan. Keıinnen Qyrǵyzstannyń sot júıesin ári qaraı reformalaý boıynsha komısıany basqarǵan. 2015 jyly «Atameken» partıasynyń tizimimen parlament depýtaty bolyp saılanǵan.
