Rysmendıev Amanjol Sovetbekuly - halyqaralyq deńgeıdegi transformasıalyq bıznes-trener. Kóshbasshylyq jáne bıznesti damytý salasy boıynsha elimizdegi eń kóp suranysqa ıe bıznes-keńesshi. TMD boıynsha óz semınar-trenıngteri arqyly jyl saıyn 5000-nan astam adamnyń sapaly ómir súrýine áser etip júrgen motıvatorlyq orator.
Amanjol Rysmendıev 1991 jyly maýsym aıynyń 16 juldyzynda Almaty oblysy Uıǵyr aýdany Súmbe aýylynda dúnıege kelgen. Qarapaıym otbasydan shyqqan. 1997 jyly Súmbe aýylynyń ortalyq mektebine barady. Mektepte sabaqty úzdik oqyǵandyǵymen kózge túsip 2004 jyly Abaı atyndaǵy Respýblıkalyq daryndy balalarǵa arnalǵan qazaq tilimen ádebıetin tereńdete oqytatyn orta mektep-ınternatyna túsedi. Mektepte oqyp júrip 9-synypta Respýblıkalyq «Ara» jýrnalynda tilshi, Respýblıkalyq «Qyz qupıasy» jýrnalynda bas redaktorynyń orynbasary, Respýblıkalyq «Jas órken» qoǵamdyq uıymynda jas jýrnalıserdiń Vıse-prezıdenti, Prezıdenti qyzmetterin atqarady.
Amanjol Rymendıevtiń «Ózińdi oıat», «Órleý», «Krızısten shyǵýdyń jeti joly», «Kásipkerlik qupıasy», «110% -ǵa jaqsy ómir súrem deseńiz...» «Bıznestegi bes qarý» atty motıvasıaǵa toly kitaptary oqyrman nazaryna jol tapqan.
Ózińdi oıat, dabylyn qaqsyn armanyń!
Ózińdi oıat!
Júre bermeı túńilip,
Kúdiktenip, qorqyp, ylǵyı kidirip.
Tutansyn sende jalyn beretin júrekke,
Umtyldyratyn Uly arman jáne Bir úmit.
Ózińdi oıat!
Dabylyn qaqsyn armanyń,
Kútýde talaı jetistikteriń alda myń.
Shabyttanǵaısyń jarqyn bolashaq jaıynda,
Ýaıym-qaıǵynyń astynda sónip qalmaǵyn.
Ózińdi oıat!
Adam ekenińdi eske alyp,
Bilimniń jolyn, ilimniń jolyn tóske alyp.
Ómir degeniń ótkeniń emes, qalǵany --
Júrgen joqsyń sen jaqsylyqtardan kesh qalyp.
Ózińdi oıat!
Kúshińdi sezin jasyndaı,
Talantyń -- taýdaı, tek qana jatyr ashylmaı.
Úlken oıyńmen úlken jobalar bastarsyń,
Umtylsań dosym uıalshaqtyqqa bas urmaı.
Ózińdi oıat!
Júgenin jiber, júıriktiń,
Demegin maǵan «Orynsyz jerde kıliktiń».
Qıyndyqtardy synaq dep qara baptaıtyn,
Kúresip júrip men-daǵy qalqam, shıryqtym.
Ózińdi oıat!
Ótirik oılarmen tús kórmeı,
Qıaldap júrip qalmasyn isiń istelmeı.
Árekettengin, áreket -- ómir ózegi,
«Bilmedim» deme, aspannan jańa túskendeı.
Ózińdi oıat!
Ómiriń ótip ketpesin,
Orala qoımas ýaqyt degeniń ótkesin.
Armandaryńdy júzege asyr jigermen,
Kóńilińdegi kógildir raýshan kóktesin!!!
Júz paıyz jaýapkershilik
Erinip júrmiz, kerilip júrmiz, múmkindikterdi kemsinip,
Ózinshe bolyp, ómirden izdeı kiltıpandar men kemshilik.
Jetpeıdi-aý bizge bereke, baılyq, keńshilik,
Óshpese boıdan kertartpa minez, ersilik.
Tabysty bolyp, aǵysqa qarsy armandaryńa umtylsań,
Qajetti saǵan júz paıyz jaýapkershilik!
Tabysty tosyp, baqytty kútip, baıbalam sala basqadan,
Adamdar tola talpynystaryn, tabandylyǵyn tastaǵan.
Sanańnyń bolsa sarqylmas, sónbes sáýlesi,
Sanasyzdardan túńile bermeı, qash balam!
Shaǵymdanyp, synyqqa syltaý izdeseń,
Jumysyń bitpes bastaǵan!
Qalaýyn tapsań qar janar...
Tulǵa bolsań mándi oıdy derek eter,
Eńbekti elden eren elep óter.
Oılar tastap qozǵaıtyn, «qozdyratyn»,
Shabytyma sharshamaı ere ketem.
Maqsatqa umtyl, rýhyńdy bıik ustap
«Qalaýyn tapsań qar janar», -- degen eken!
Esińde usta, aqyn da, ǵalym da – adam,
Sende de bar daýyl kúsh damyldaǵan.
Jalqaýlyqpen jatyp ap joldas bolsań,
Baqytyńdy, baǵyńdy, baryńdy alar.
Jumylǵyn jumysyńa júz paıyzǵa,
Asýlar joq eńbekke alynbaǵan!
Taý tabysty talaılar eles deıdi,
Qaıtemiz, sanasymen keńespeıdi.
Armanyna jetem dep sene almasa,
Jalǵyz túgili, ókimet, el óspeıdi.
Batyrym, bolashaǵyń óz týyndyń,
Ótken kún men bolashaq teńespeıdi!
Eren ispen erlershe ekpindeısiń,
Berik ustar bilimin bekpin deısiń.
Sýlansa kúdiktermen bolashaǵyń,
Sáýlesimen senimniń keptirgeısiń.
Qandaı jaǵdaı bolsa da jabyrqamaı,
«Qaıyry bar ár istiń», -- dep bilgeısiń!
Talpynys
Ómirdiń máni, kóńildiń sáni – talpynys,
Maqsatqa umtyl, «jetem» dep bala, al, tyrys.
Armandy kózdep, boıyńdy ózgert, sharshama,
Bolmasyn sende ynjyqtyq jáne alqynys.
Sanańda jatyr, sapyrsań qansha jobalar,
Júzege asyr, mán bermeı júrseń joǵalar.
Jarqyn oı bolsyn, basyńda baǵyt beretin
Ómir degeniń oıyńnan bastap ońalar!
***
Erinesiń, kerilesiń, berilesiń ýaıymǵa,
Ómirińniń osal tusy jaıynda.
Basty kóter, bul zamanda op-ońaı,
Tik qasyqty sala almaısyń daıynǵa.
Qoldaǵandy, qorǵaǵandy ózgelerden kútpegin,
Kerek emes esh bir janǵa problemań, júkteriń.
«Óz baqytym -- óz qolymda», -- dep bilip,
Keregesin senimińniń tiktegin!
Qyransha ómir súreıik!
Úlkender, orta býyn, jastar jaǵy,
Qansha boldy bizge ómir bastalǵaly?
Jigersizdik, oısyzdyq otan bolyp,
Taıýda qansha adamnyń bastan baǵy.
Qaısarlyqpen armanǵa jete bilip,
Jazylǵan daralanyp dastandary.
Babalardy urpaǵy oılandyrǵan,
Táýelsizdik bolyp bir basty armany.
El bop turmyz eńsesi eńkeımeıtin,
Seziledi erliktiń astan dámi.
Babalardaı namysshyl bolaıyqshy,
Qyrandaı qalyqtaǵan aspandaǵy.
Namys qaıda, kúsh qaıda, jalyn qaıda?!
Berilip urpaǵy júr ýaıymdarǵa,
Urpaǵy júr «ós» deseń syltaý aıtyp,
Uıatyń qaıda, qazaǵym, aryń qaıda?!
Qyrandaı táýekelge bel baılasań,
Alam degen asýlar alynbaı ba?!
Senimińe jigerdi serik etseń,
Qorqynyshyń, kúdigiń arylmaı ma?
Úlken-úlken istersiz máz bolamyz,
Tolǵanyna tompıyp qaryn maıǵa.
Oılanbastan uıyqtaımyz túske deıin,
Armanyń uryp turar dabyl qaıda?!
Ómir ótti dep keıde qapalanyp,
Ókinemiz, óksımiz jata qalyp.
Máz bola, balam bar dep qýanamyz,
Ózinshe bir «Áke» dep ataq alyp.
Tárbıesi balanyń oılantpaıdy,
Umytqanbyz mindetti ata-analyq.
Qyran bolmaı, ózimiz úlgi bolar,
«Qyran bol!»dep, beremiz bata baryp.
«Áke úlgi ulyna bolsyn» degen,
Uly halyq, qazaqtaı ata halyq.
Qyrandaı bıikterde samǵaıyqshy,
Jetistik pen ımandy qatar alyp.
Sózben emes, ispenen tasqyndaıyq,
Oryndalsyn shyn borysh ata-analyq!!!
Tabysqa bastar shýmaqtar
Ustaı bilgin ózińdi jaǵymdy oıda,
Bile-bilseń taǵyń da, baǵyń da oıda.
Júrek kóziń jaqsylyq kóre bilsin,
Jaqsy oıdan jaqsy is tabylmaı ma?
***
Baǵytsyz bop ózińdi aqsatpaǵyn,
Aıqyn bolsyn jazylyp maqsattaryń.
Aıqyn jolda qadamdy anyq bassań,
Bıikterde belgili asqaqtaryń!
***
Durys iste isińniń ebin bilip,
Jatyp alma, ózińdi erindirip.
Senimińdi aldyrma sátsizdikke,
Oryn alsyn júrekte senimdilik.
***
Sabaq qylyp ómirdiń tosqaýlaryn,
Bolashaqty babymen josparlaǵyn.
Josparyńa – áreket sáıkes kelse,
Keledi qut-bereke, tosqan baǵyń.
***
Ótirik, urlyq, qorlyq – sumdyq bolar,
Adamdyqtyń asyly shyndyq bolar.
Súbeli sózderińde shyndyq bolsa,
Sóz beremin basyńa shyn qut qonar.
***
Paıymyń bolmasynshy alasa tym,
Bilimiń – naǵyz qarý, talasatyn.
Bıikter berilmeıdi ońaılyqpen,
Bıik bolsyn, qashanda parasatyń!
***
Imanǵa júregińdi jetektegin,
Alla aldynda paryzdy ótep bergin.
Bereke bolsyn deseń isińizde,
Shyn peıilmen sadaqa, zeket bergin!!!
Aǵaıyndy, týysty elep júrgin,
Demeýi joq jandardy demep júrgin.
«Keń bolǵandy – kem qylmas» degen halyq,
Jetim kórseń jarylqap, jebep júrgin.
***
Oılaryńnyń baǵyt qyp tunyqtaryn,
Úlgi bolsyn ózgege qylyqtaryń.
Túńilme, taǵdyryńda taıǵanasań,
Túnnen keıin tań atar, umytpaǵyn!
***
Sátsizdik ýaqytsha, taryqpaǵyn,
Úırenesiń súrine, tanyp bárin.
Oryndalmas armandar joq jalǵanda,
Talpyna ber, qaımyqpa, jalyqpaǵyn.
Árekettiń qanatyn qomdaı bilseń,
Belgili bıikterde qalyqtaryń!!!
Aqsha
nemese baılyqtyń bes zańdylyǵy
Oryndaýǵa armandardy, basqa da,
Shyny kerek, jumys isteımiz aqshaǵa.
Tabylmasa qaltańda bir tıynyń,
Ash qalasyń, tegin emes asqana.
Ómir osy, baǵyn meıli baǵynba,
Sol aqshada baqytyń da, baǵyń da.
Turmysyńdy túzeý bolsa armanyń,
Baıý joly zańdylyǵyn qabylda!
Birinshi zań, jelkenindeı kemeniń,
Aqshalardy qoldyń kiri demegin.
Aqsha seniń eńbegińniń jemisi,
Eńbegińdi elden bólek elegin.
Qarap dosym aqshalarǵa qurmetpen,
Tıyndardy kóre qalsań tere bil!
Ekinshi zań, jumsa aqshańdy eseppen,
Sabaq alyp qatelikten keshe ótken.
Kirisiń men shyǵynyńdy basqaryp,
Óz-ózińe kúnde keshke esep ber,
Jumsa aqshańdy, jospar jazyp jónimen,
Bul ómirge bolmas sonda esh ókpeń.
Uranyń ǵyp ustap júrgin máńgilik,
Baılyq degen bastalady esepten!
Úshinshi zań, tártip atty atqa min,
Bul ádetti bardy salyp baptaǵyn.
Ár aılyqtan bolashaǵym úshin dep,
On paıyzyn esh jumsamaı saqtaǵyn.
Saqtaı bilgin on paıyzdy qashanda,
Az bolsa da, saz bolsa da tapqanyń.
Bul on paıyz – orny bólek uryqtar,
Baılyq atty jemis berer baqtardyń.
Tórtinshi zań, taıazdanbaı oılaryń,
Saqtaǵandy shyǵyn etip qoımaǵyn.
Sen tabysty bola almaısyń, qaraǵym,
Baǵynbaıtyn bolsa eger boıda min.
Kóbeıtýdiń jolyn izdep aqshańdy,
Ebin biler bızneske boılaǵyn,
«Teńge degen quralady tıynnan»
Dep osylaı tursyn ylǵı oıda ún!
Besinshi zań, ómir súrgin shúkir dep,
Kesirlenbeı, «boldym, toldym, pistim» dep.
Kómektesip kemtarlarǵa, jetimge,
Eliń úshin eleýli iske túskin kep,
Sadaqa ber bir Allańdy umytpaı,
Álsiretpeı ımanyńdy shúkir dep!
Súrem deseń ómirińdi mándi ǵyp,
Kómekteser osyndaı bes zańdylyq,
Bes zańdylyq qaǵıdasy baılyqtyń,
Kúshin joımas ustanǵanǵa mángilik.
Baılyq tańy múmkin emes sen úshin,
Júre berseń mán bermesten pań kúlip.
Al, ustansań tasyń órge domalap,
Qıyn kúnin kedeıliktiń qaldyryp,
Keler saǵan baılyq atty tań kúlip.
