Týrasyn aıtaıynshy: táýelsizdik alǵanymyz zor qýanysh qoı, biraq, osy shırek ǵasyrda kóp qadirlimizden aıyrylyp qaldyq. Sol qadirlilerdiń – eń qadirlisi – SÓZ!

Sózden qadir ketti, jurdaı bolýǵa aınaldy. Qazirgi ákimiń – keshegi ury, búgingi bastyǵyń – keshegi barymtashy bolsa, sózdiń qadiri ketpeı qaıtedi?..

Jaýjúrek jazýshy Qabdesh Jumadilov qazaqtyń aqıyq aqyny Qadyr Myrza Áliniń qyrqynda: «Qadyrmen birge bir dáýir ketti, ádebıettiń altyn ǵasyry» – dep edi...
Qalaı dóp aıtqan?!. Qalaı dál tapqan?!.

Men jek kóretin, namysymyz ólmegenimiz óltire jamandaıtyn «keshegi keńestiń» kezinde qazaq ádebıetiniń altyn ǵasyry jazarmandarynyń kitaptary 40-50 myń danamen shyǵyp turatyn. Sonyń ózi bárimizge jetpeı, bir-birimizden jalynyp-surap alyp oqıtynbyz...
Qazirgi qazaq jazýshysy – dıýana. Kókiregi saırap tur, júregi altyn qazyna, talanty shartarapqa shabady, qaltasy tesik, kıgeni jupyny, jigeri juqalǵan, bedeli muqalǵan...
Esesine, eldi aldap-arbaǵan, urymtal urlaǵan alaıaqtar jýanqaryn bolyp, baıyp alǵan. Álgi dıýana baıǵusqa topqa kirip kórmegen jalańput jeti atasyn maqtatyp, jazdyrady. Jazarmanǵa da shaılyq kerek, amal neshik, qarap otyryp óle me?!.
Ótkende meniń bir jerlesim (álgi eldi aldap-arbaǵan, urymtal urlyǵyn aıta beretin alaıaqtyń biri) óziniń marqum anasy týraly kitap jazdyrypty. Sonda aıtady deıdi: «Meniń anamdy bul kitapta Domalaq Anadan asyrmasań, kem qylmaı jaz» dep...

Búgingi qazaq jazýshysynyń bedelin – kúzetshiden de tómen túsirip aldyq. Úıtkeni, kúzetshiniń ózi ary-beri ótkenge edireńdep, aqyl aıtyp qoıady. Al, jazýshymyz – jezóksheniń etek jaǵynda jumǵan aýzyn asha almaıdy...

Jalpy, qolynda ótkir qalam-qylyshy bar jazýshyǵa tym jataǵandaý, tym kónbisteý, tym tártiptileý bolý – jarasa ma?!. Sosyn shyǵar, bıliktiń aýzyna kelgenin aıtyp, «oryssha aıtqanǵa – qazaqsha jaýap berseń, jumystan taıdyramyn» dep qoqı qorazsha qoqańdaıtyny?!..

Abyroıy abdyratqan Áýezov, mysy basqan Muqanov, esin ketirgen Esenberlın, qabaq-janarymen jaýratqan Juban Moldaǵalıevter qaıda?..

Neǵyp óńsheń qoıanjúrek qorqaqtar qaldy? Nege jazýshy jasyp ketti? Jazarman jasysa, oqyrman oısyraıdy...
«Uıat bolmasyn» desek, dúr silkinýi kerek, jazarman qaýymnyń...

Qajymuqan Ǵabdolla