Jergilikti stomatologıanyń birinde Aqtóbe turǵyny qyzdy kepildikke ustaǵan.
Vıdeoda er adam qurbanyna pyshaq syndy buıymdy suqpaqshy bolyp, óz áıelin ákelýdi talap etip turǵany baıqalady.
Oqıǵa Aqtóbede oryn alǵan.
«14 naýryz kúni Aqtóbeniń belgisiz turǵyny stomatologıa ishinde 1991 jylǵy qyzǵa pyshaq nusqap, ses kórsetkeni jaıynda habar kelip tústi. Er adamnyń qolynda pyshaq bolǵan. Polısıa qyzmetkerleri qylmyskerdiń 1993 jylǵy jumyssyz ekenin, sondaı-aq 2016 jyly urlyq jasap, isti bolǵanyn aıtty» dep habarlady Aqtóbe oblystyq İİD.
Polısıa qyzmetkerleriniń aıtýynsha, 7 naýryz kúni áıelimen ajyrasqan erkek áıelin sol jerge ákelýdi buıyrǵan. Aqtóbe qalasynyń İshki İster Departamenti anyqtaǵandaı, er adam bul jaǵdaı oryn almas buryn 3 saǵat aldy kúdikti áıeliniń tórkinine baryp, enesine pyshaq suqqan. Áıel adam aýyr jaraqat aldy. Al erkek áıelimen kezdese almaǵan jaǵdaıda, enesin óltiremin dep ses kórsetken.
Aqtóbe oblystyq İİD basshysy, prokýrorlar, polısıa qyzmetkerleri kepildegi qyzdy bosatý úshin qylmyskermen 5 saǵat boıy kelisimge kelýge tyrysqan. Alaıda, qylmysker aıtqanyna qaıtpady. Oqıǵa ornyna qylmyskerdiń týystary da keldi. Al er adam áıelin kórsetpegen jaǵdaıda qyzdyń óletiniń aıtyp, óz degeninen qaıtpaǵan. Onyń sózine qaraǵanda, er adam óz áıelin de óltirmek bolǵan. Polısıa qyzmetkerleri qylmyskermen kelisimge kele almaǵandyqtan, túngi 12-ler shamasynda kúshpen shara qoldanýǵa kóshti. Sóıtip, qylymysker qolǵa, tutqyn bosatyldy. Qýaynshqa oraı, esh jeri jaraqattanbaǵan. Alaıda, júıke kúızelisine ushyraǵan. Qazirgi ýaqytta qyz dárigerler men psıhologtardyń qaraýynda.
Aqtóbeniń İshki İster Basqarmasynyń aıtýynsha, «Qarý qoldaný arqyly adamdardy kepilge alý» jáne «Densaýlyqqa qasaqana zıan kórsetý» baptary boıynsha kúdiktige qatysty qylmystyq tergeý bastaldy.
