Ótken aptada Reseıdiń Lenıngrad oblysy Prıozersk qalasynda oınap júrgen balany jıpimen soǵyp, tizerletip otyrǵyzyp qoıyp tárbıelemek bolǵan reseılik bıznesmenniń áreketi jurttyń jaǵasyn ustatty. Qazir bul másele Dýmadaǵylardyń qulaǵyna jetip, qyzý talqyǵa tústi, dep habarlaıdy Baq.kz.
Oqıǵa 9 naýryzda oryn alǵan. Jol jıeginde eki búldirshin oıynshyq qarýdy ótken-ketken kólikterge kezenip, plasık oq atqan. Kenetten júıitkip kele jatqan qara jıptegi er adam balalardyń áreketine ashýlanyp, jol erejesin buza-muza, keri burylyp, olardy qýa jóneledi. Qos balanyń eresekteýi kishisin úıge qaraı qýyp, ózi ońǵa qaraı júgiredi. Jıptegi er azamat qarshadaı balany qýyp jetkenimen qoımaı, soǵyp qulatady. Ol azdaı, kóliginen shyǵyp, balany qardyń ústine tizerletip otyrǵyzyp qoıyp, «tártipke salady». Ashýyn shyǵaryp bolǵan soń, oqıǵa ornyna tártip saqshylaryn shaqyrǵan.
Kelip túsken qońyraý boıynsha oqıǵa ornyna jetken polıseıler istiń mán-jaıyn teksermesten júrgizýshini jibere salǵan. Dál sol kúni balanyń jaraqat alyp, tártip saqshylary tıisti shara qoldanbaǵaly jaıly telehabarlama túsedi. Sondyqtan osy qylmystyq isti qarastyrý barysynda polıseılerdiń áreketi de jiti tekseriletin bolady.
Balany quqyq qorǵaýshylardyń qolyna tapsyrǵan soń oqıǵa ornynan taıyp turǵan jıp ıesi kinásin moıyndap, polısıaǵa óz erkimen berilýdiń ornyna, birqatar BAQ-qa suhbat berip, osy áreketimen balany tárbıelemek bolǵanyn aıtyp aqtaldy. Tipti, jol jıegine oınatyp qoıǵan ata-anasyn aıypqa aldy. Dese de, er adamnyń balany qorlaǵan qatygez áreketi kóshedegi vıdeokameralardyń birine túsip qalǵan.
Reseı Tergeý komıtetiniń basshysy kináli er azamatty qamaýǵa alý týraly buıryq beredi. Keshe kúdikti qolǵa tústi. Ol jergilikti tanymal kásipkerlerdiń biri Vladımır Belskıı bolyp shyqty. Onyń ústinen buzaqylyq týraly qylmystyq is qozǵalǵdy.
Endi bul daý Dýmadaǵy depýtattardyń qulaǵyna jetken. Osy máseleni talqyǵa shyǵarǵan depýtat Irına Iarova bul iske tergeý komıtetimen birge bas prokýratýranyń da aralasýyn surady. Onyń aıtýynsha, balanyń balalyq áreketine sonshalyqty ashýlanǵan adamnyń aqyl-esi túzý emes.
«Onyń bul áreketin buzaqylyq dep qana emes, balanyń densaýlyǵyna qaýip tóndirgen qastandyq dep baǵalaý kerek», - dedi depýtat.
Bas prokýratýra men Tergeý komıtetine joldanǵan depýtattyń saýalyn memdýmanyń spıkeri Vácheslav Volodın de qoldady.
«Balalarymyzdy basyp jatqanda, sizder men bizder qur qarap otyrmaýymyz kerek. Bul bizdiń balalarymyz», - dedi spıker.
