Maqalanyń orysshasyn myna jerden qarańyz

Soltústik Qazaqstan oblysy Naýryz merekesin toılaýdy Maǵjan Jumabaev kóshesinen bastady dep habarlaıdy Qamshy.kz.

Alash arysy Maǵjan Jumabaev atyna berilgen kóshede «Qazaǵymnyń kıiz úıi» atty kıiz úı qalashyǵy boı kótergen. Sondaı-aq, «Naýryz dostyq pen birliktiń berekesi» atty merekelik teatrlandyrylǵan konsert ótip jatyr.

Qýanysh merekesimen halyqty quttyqtaýǵa Soltústik Qazaqstan oblysy ákimi Qumar Aqsaqalovtyń ózi arnaıy kelgen. Ol halyq aldynda Naýryz merekesiniń rýhanı qundylyǵy mıllıondaǵan adamdary biriktirip, berekesin arttyratynyn basa aıtqan.

«Bul mereke etnıkalyq jáne dinı senim erekshelikterine qaramastan barsha qazaqstandyqtardyń merekesi» degen Qumar İrgebaıuly oblys turǵyndaryna zor densaýlyq, baqyt pen bereke tilegen.

Al, Konstıtýsıa kóshesinde Qazaqstan halyqtary Assambleıasy ókilderi 15 metrlik dostyq dastarhanyn jaıǵan.

Odan bólek Qumar Aqsaqalovtyń bastamasymen Qyzyljardyń 30-dan astam kópqabatty úıiniń aýlasynda Naýryz dastarhany jaılyp,  halyqqa naýryz kóje berilgen. Mysaly Bolatbaev 4 úıiniń aýlasynda 200 adamǵa naýryz kóje berilgen. Qala men oblys turǵyndary asqaq merekelik kóńil-kúıge ıe bolyp, merekeni toılap ózara tilek aıtysyp jatyr.