«TÚRKSOI» Halyqaralyq uıymy, QR Mádenıet jáne sport mınıstrligi jáne Ońtústik Qazaqstan oblysy ákimdigi birlesip bekitken is-sharalar josparyna sáıkes 21 naýryz kúni «Túrkistan – Túrki áleminiń mádenı astanasy» atty saltanatty sharasy bastaý aldy.
İs-sharanyń ashylýynda sóz bastaǵan Ońtústik Qazaqstan oblysynyń ákimi Janseıit Túımebaev barsha jurtshylyqty «Túrkistan - Túrki áleminiń mádenı astanasy» atanǵan jyldyń bastalýymen quttyqtap, osy abyroıly mindetti birlese ótkizýge shaqyrdy. Kelesi sóz kezegin alǵan «Áziret Sultan» memlekettik tarıhı-mádenı qoryq-murajaıynyń dırektory Jandos Áýbákir kelgen qonaqtarǵa Qoja Ahmet Iasaýı kesenesinde jerlengen han-sultandar, batyrlar men bıler, ıgi jaqsylar men tarıhı tulǵalar jaıly málimet berip Qazaqstan tarıhynda sáýlettiń kórnekti eskertkishi, Túrkistannyń negizgi mádenı oryndarynyń biri sanalatynyn atap ótti.
Rýhanı astanaǵa kelgen meımandar eń aldymen Qoja Ahmet Iasaýı kesenesine zıarat etip, sonymen qatar, Orta ǵasyrlyq kóshe boıynda ornalasqan etnografıalyq jádigerler men qolóner sheberleriniń týyndylaryn tamashalaı kele jańartylǵan «Túrkistan tarıhy» mýzeıi ekspozısıasymen tanysty. Mýzeı ekspozısıasynyń basty baǵyttary (konsepsıasy) retinde Túrkistan ólkesin alǵashqy adamdardyń qonystanýynan bastap qola, erte temir dáýirleri tusyndaǵy eskertkishter, alǵashqy turaqtar men otyryqshylyq qonystary jáne ejelgi dáýir qalalary, erte orta ǵasyrdaǵy qalaqurylysy eskertkishteri men Túrki mádenıeti, ólkeniń saıası, ekonomıkalyq jáne rýhanı ortalyqtarynyń damý tarıhy, Túrkistannyń Qazaq handyǵy tusyndaǵy damýy men astanaǵa, keseneniń ulttyq panteonǵa aınalýy jáne Táýelsizdik tusyndaǵy Túrkistan men ólkeden shyqqan tarıhı tulǵalar jaıly keń kólemdegi tarıhı, arheologıalyq, etnografıalyq, nýmızmatıkalyq túpnusqa jádigerlermen, mátindermen negizdelgen keshendi mýzeılik qurylymdar usynyldy. Ekspozısıa 8 bólimnen turady.
Áz-Naýryz merekesine arnalǵan «Naýryznama» is-sharasyna jáne Qoja Ahmet Iasaýı kesenenesin tamashalaýǵa 23 túrkitildes elden myńǵa jýyq qonaqtar keldi. Onyń ishinde TÚRKSOI Halyqaralyq uıymynyń bas hatshysy Dúısen Qaseıinov bastaǵan resmı delegasıa, túrkitildes jáne basqa da memleketterden kelgen qonaqtar. QR Mádenıet jáne sport mınıstri Arystanbek Muhamedıuly, OQO ákimi Janseıit Túımebaev, senat jáne májilis depýtattary, qazaqstandyq zıaly qaýym jáne óner tulǵalary, memleket jáne qoǵam qaıratkerleri, joǵary jáne orta arnaýly oqý oryndarynyń basshylary men oqýshylary, stýdentter, BAQ ókilderi jáne mýzeı qyzmetkerleri qatysty.
