Naýryzdyń 21-i kúni Almaty-2 temir jol vokzalynan Almaty men Tashkenttiń arasynda jolaýshy tasıtyn «Tulpar-Talgo» júrdek poıyzy alǵashqy saparyna shyqty dep habarlaıdy «Qazaqstan temir joly» ulttyq kompanıasy baspasóz qyzmeti.

«Qazaqstan temir joly» kompanıasy vıse-prezıdenti Erik Imashevtiń sózinshe, kórshiles eki el arasyndaǵy jańa poıyz qatynasy Qazaqstan men Ózbekstan úkimetteri arasynda jasalǵan kelisimi negizinde júzege asyrylyp otyr.

«Qazaqstandyq jáne ózbekstandyq temirjolshylar halyqaralyq poıyzdy belgilengen kestege saı júrgizýge baryn saldy. Bul bizdiń halyqaralyq baǵdardaǵy birlesken jobamyz bolyp tabylady» degen Imashev.

29 vagonnan turatyn júrdek poıyz Almatydan dúısenbi jáne senbi kúnderi, Tashkentten seısenbi men jeksenbi kúnderi jolǵa shyǵady, eki aralyqty 16 saǵat 30 mınýt júredi. Poıyz jol-jónekeı Otar, Shý, Taraz, Shymkent, Saryaǵashqa aıaldaıdy.

Poıyzdyń baǵasy Almatydan-Tashkentke deıin: lúks - 13 036 teńge, bıznes - 11 077 teńge, kýpe - 9 342 teńge jáne otyratyn oryndary - 4 228 teńge turady.

Qazirgi kezde qazaqstandyq óndiristen shyqqan jańa da jaıly vagondarmen jabdyqtalǵan 14 júrdek poıyz baǵdarlary respýblıkanyń barlyq oblys ortalyqtaryn jalǵaıdy.

Júrdek poıyz qozǵalysyn damytý «Qazaqstan temir joly» UK» AQ basym baǵytynyń birinen sanalady.