Almaty aýrýhanasynda búırek donory qaıtys bolǵan. Osy derek boıynsha jergilikti ishki ister departamenti sotaldy tergeý júrgizip jatyr, - dep habarlaıdy Tengrinews.kz 

"UQKD-dan Almaty qalalyq Tergeý basqarmasynyń tergeýshileriniń óndirisine búırek donorynyń ólimi týraly is 4 aqpanda tústi. Qazirgi ýaqytta is boıynsha barlyq qajetti prosesýaldyq sharalar júrgizilip jatyr. Komısıalyq sot saraptamasy taǵaıyndaldy", - dep habarlady Almaty qalalyq İİD resmı ókili Saltanat Ázirbek. 

Onyń aıtýynsha, sotaldy tergeý QR Qylmystyq kodeksiniń 116-babynyń 3-bóligi boıynsha ("Adamnyń aǵzalary men tinderin alyp qoıýǵa májbúrleý nemese zańsyz alyp qoıý") júrgizilip jatyr. 

"Ázirshe eshkim ustalǵan joq. İstiń mán-jaıy anyqtalyp jatyr", - dedi Ázirbek. Aıta keteıik, osy baptyń jazasy - múlki tárkilenip nemese onsyz, belgili bir laýazymdardy atqarý nemese belgili bir qyzmetpen aınalysý quqyǵynan bes jylǵa deıingi merzimge aıyra otyryp nemese onsyz, bes jyldan on jylǵa deıingi merzimge bas bostandyǵynan aıyrý.

Búırek donorynyń Almatyda 19 qańtarda qaıtys bolǵany belgili. Aǵza aýystyrý boıynsha operasıa 7 jeltoqsanda №7 qalalyq aýrýhanasynda bolǵan. Osyǵan deıin QR densaýlyq saqtaý mınıstri "ólimniń asqynýdan" bolǵanyn habarlaǵan edi. Sebebi, aıtýynsha, kúrdeli operasıa bolǵan, qan ketken jáne qaıtalaı operasıa júrgizilgen, alaıda dárigerler onyń ómirin aman alyp qala almaǵan.