Aqtóbede zıaly qaýym ókilderiniń aldynda sóz sóılegen tanymal saıasatker qoǵamnyń basty problemasyn ótkir kóterdi. Ol mekteptegi muǵalimderdiń 45 paıyzy kúıeýimen ajyrasqanyn tilge tıek etti dep habarlaıdy nur.kz portaly.
Qoǵam qaıratkeri ákesiz ósip kele jatqan balalardy kúıeýimen syıyspaǵan muǵalimderdiń tárbıelep jatqanyna alańdady
"Maǵan bir mekteptiń dırektory: "Meniń oqýshylarymnyń 45 paıyzynyń ákesi joq, ajyrasqan otbasynan. Ol balanyń psıhologıasy áke-sheshesi bar balanyń otbasyndaı turaqty emes. Meniń muǵalimderimniń deni - áıelder. Onyń 40 paıyzy baıynan aıyrylǵan. Anaý da jyndy ákesi joq, mynaý da jyndy baıy joq. Synypta shart-shurt talas" dep aıtty. Bul - shyndyq", - dedi qoǵam qaıratkeri Amangeldi Aıtaly.
Jastar tárbıesine zıaly qaýymnyń kóńil aýdarýyna qatysty ótken kezdesýde baryn baǵalaı bilmeıtin jastar legine qatysty da Aıtalynyń aıtary boldy.
"Biz tutynýshy qoǵam qurdyq. Dúnıeqor, aqsha aldyna shyqqan, rýhanı qundylyqtardan keıin qalǵan qoǵam. Sosıolıstik qoǵamda ne nársege de zárý boldyq. Bizdiń anaǵan, mynaǵan qolymyz jetpedi. Myna zaman keldi. Bárine qolymyz jetti. Tárbıe men rýhanı qundylyq keıinge qaldy",-dedi Amangeldi Aıtaly.
Saıasatker dúnıeqor zamanda adam kapıtalynyń umyt qalǵanyn aıtty.
"Búgin óte qıyn zaman. Urpaq almasady. Biz 40 jasqa deıingi jastardyń pikirin kóp bilmeımiz. Táýelsizdik alǵan kezde 13-14 jasta bolǵan jastar bólekteý. Olarmen jumys jasaý kúrdeli. Baıaǵy standart kelmeıdi", - dedi ol.
